按圖可將圖片放大
Category Archives: 心妍報章新聞
2014年11月7日 頭條日報 練舞搞到周身傷 關心妍急按摩鬆一鬆
「人妻」關心妍（Jade）為照顧「餓過飢」兩年歌迷，將於本月28日及29日一連兩場在九龍灣國際展覽中心匯星Star hall舉行「關心妍說演唱會2014」，眼見演出日子逼近，Jade日日練舞7粒鐘惡補跳到氣都咳，周身骨痛，仲不慎弄傷頸椎舊患要睇跌打同物理治療。為了紓緩緊張情緒，日前Jade忍唔住去至愛按摩店享受一個泰式香油按摩加腳底按摩，忙中偷閒鬆一鬆骨，叉滿電的她猛話爽呀！
採訪：方騫平 攝影：李權威
場地提供：Zen＠銅鑼灣百德新街53號海德大廈4樓B室 電話：25010002
日前成個殘晒的關心妍急去老友間Zen按摩店做泰式香油按摩加腳底按摩，歎足個幾鐘埋單都係500幾蚊，對她來說真係抵到爛！最重要係效果顯著，一身鬆晒，她說：「我係一個骨精，但凡去到邊個地方旅行都會去做spa，所以對按摩好有要求，兼且都好受得力！我好鍾意呢度舒適環境，除夠晒私人外，連柔和燈光同香薰香味都好我，最重要係按摩師技巧好好，做得好貼手，好有水準。而且收費一都唔貴，呢排都勤上。」
唔怕老公搥邪骨
Jade自爆平日好少跟老公楊長智（Jonas）一齊去按摩，除了她，老公唔鍾意俾人掂身體！她笑說：「所以我百份百擔保老公唔會去搥邪骨，更何況去滾呢冇得驚，我對自己魅力好有信心，更加唔會管束佢，反而好鼓勵佢同朋友出街消遣，唔好咁快返阻住我睇電視！互相信任同埋有高度自由度，成為我倆夫妻相處心得！」
對於即將舉行的演唱會，她預言會帶畀歌迷驚喜，個唱中會用C-12身份性感、狂野演出，甚至安排有辣身舞，所以真係誠意之作，每個舞步都有血有汗，她說：「我真係後悔咁遲先至學舞，因為跳舞資質低，手腳唔協調跳得好吃力，但為了答謝歌迷辛苦少少都值得。」
※自認骨精的關心妍，按摩按上癮。
※關心妍好受得力，按頸扭身，無有怕。
※近排關心妍勤去呢間泰式按摩店，私隱度高，且女師傅手勢好。
※關心妍絕對信任丈夫楊長智。
※關心妍正為一連兩日的個唱苦練。
※兩年幾前，關心妍曾在紅館開個唱。
※跳舞跳到散晒，按完腳再按身。
2014年11月3日 頭條日報 關心妍 喜見操出「人魚綫」
關心妍(Jade)昨日出席商台活動，她透露為演唱會操練的「人魚綫」已有雛形，但最辛苦的莫過於排舞，加上天資有限，已因此看了兩次跌打，紓緩頸椎舊患。Jade又指現在開始穿高辳鞋練舞，最怕臨尾拗柴，影響演出，「因為我沒有42吋長腿，只得32吋，所以沒辦法不穿高辳鞋，因為這Part舞衣最性感，一定要拉長比例才好看。」
問到有否因專注練習而令老公詐型？Jade坦言感激老公體諒，完成個唱後亦會繼續造人大計，希望盡快有好消息。她又指自己有不少契女，故深明與小朋友相處之道，最重要是浮誇「哇哇聲」表達讚美，幫他們建立自信。
※關心妍正密鑼緊鼓為個唱排舞。
2014年10月26日 蘋果日報(即時娛樂) 與小方同獲「健康之星」Stephy去完紐西蘭馬甲線冇咗
陳杏妍疑因抑鬱而跳樓自殺，同為星二代嘅黃芷晴，今日同鄧麗欣（Stephy）、方力申、關心妍、黃美棋等出席《壹週刊》假屯門舉行「健康第壹大獎2014」頒獎典禮，獲頒「十大健康之星」大獎。
黃芷晴本身同陳杏妍並不相熟，不過都有留意有關新聞，未知對方係咪同星二代壓力有關，佢話:「初入行時都有壓力，不過唔係外面評論，而係自己對自己要求。」本身父母都係著名藝人，芷晴都承認父母喺佢入行初期都好關心佢嘅工作，幫佢安排工作，問到佢o依家父母開始放心畀佢自己處理未？佢話:「o依家佢哋問我時，我會叫佢哋自己睇新聞。」
剛奪得今年十大傑青嘅方力申，都係呢個頒獎禮嘅常客，今次係佢首次同女友Stephy一齊奪獎，佢想兩人畀大家一種身心形象健康嘅感覺。Stephy之前同好姊妹楊愛瑾一齊練馬甲線，點知佢剛剛去咗轉紐西蘭工作後，就食到苦練成績都冇晒，佢話：「我一向都畀人感覺好柔弱，要人照顧，都想操下畀人見到強嘅一面。」
為咗下月演唱會努力綵排嘅關心妍，經已減咗6磅，佢話:「都減得差唔多夠，o依家開始練歌，今次呢個成績係我食咗成個幾月麥包，連條脷都冇味覺。」佢坦言都辛苦老公陪佢冇得出街食飯，若果聖誕節冇工作，就會放假同老公去吃喝玩樂報答老公。 
2014年10月23日 頭條日報 備戰11月演唱會 關心妍冷落老公
人妻關心妍（Jade）將於11月28日及29日，假九龍灣國際展覽中心匯星Star hall舉行一連兩場「關心妍說演唱會2014」，為了以最佳狀態示人，Jade狠心將老公楊長智（Jonas）掟埋一邊，冇同佢慶祝拍拖同結婚周年紀念日：「家市道咁差，仲有人肯咁大投資開演唱會，好感恩，我梗係要落足心機去成就件事！」Jade大讚老公肯體諒無詐型，已係最大支持！採訪：方騫平 攝影：李權威 化妝：Cyrus lee 服裝：iBLUES
眼見演唱會逼近，關心妍開始斷食操fit法，其中一part她要以「C-12」的身份演出，大跳辣身舞，Jade說：「Star hall演出壓力冇咁大，當開一個開心party，而且呢個場聲音好靚，又可以同觀眾近距離接觸，感覺溫暖。」
眼見楊千嬅3年前11月同一場地開騷，當時秘密陀住兒子Torres，換上鬆身戰衣赤腳演出令人印象難忘，關心妍坦承：「踏上呢個福地都好想吸到千嬅（懷孕）靈氣，如果到時真係好似千嬅咁幸福有，相信係人都會戥我開心。」問到老公如何支持她開演唱會？Jade即說：「我日日練歌兼節食冇同佢食飯，呢排陪唔到佢，佢無詐型已係最大支持。」
※關心妍雖然忙備戰個唱，但佢話造人大計會同時進行喎。
※早前，關心妍化名「C-12」在網上發佈兩首新歌，獲高點擊率，之後在記者會，佢自揭真身。
※兩年前，關心妍紅館個唱好成功。 
※關心妍得丈夫默默支持。
※11年，楊千嬅陀B在九展開騷，關心妍望效法對方。
2014年10月18日 蘋果曰報 【壹週刊】【豪語錄】楚歌 關心妍
【壹週刊】【豪語錄】縱使到處散心，也望着電話做人。
——關心妍《你有心》
人家批評我們，「去飲」像去街散心，只要暫停網絡，學生哥玩唔到手機，自會無癮退場，云云。
不值一駁。關心妍說：「長期抗爭需要耐性，冇手機怎樣召集呢？有心就得。」《你有心》推出於○二年，當然唔關事，正如近作《逆來順受》本同是情歌，MV改成「雨傘革命版」，即時充滿弦外之音。
不過，難免抽水之嫌，天王天后不會來這套。你究竟在搏乜？
關心妍說：「做，總好過唔做；抽水，也要勇氣。」尤其丈夫楊長智撈證券，風險大過旺角街鋪。與黃耀明、何韻詩站在前線不同，楊太是戴着口罩去的。
闊太佔中冇問題，以情情塔塔隱喻更冇問題，屈原寫《楚辭》，何嘗不是借香草美人來憂懷時世？
楚辭就是楚歌，四面楚歌，淒楚之歌。
(相關訪問片段請進入以下網址)
http://nextplus.nextmedia.com/play/豪語錄/20141017/96855
2014年10月10日 東方日報 關心妍練腹肌跳辣舞
關心妍（Jade）昨日到電台宣傳下月底在九展舉行的「關心妍『說』演唱會2014」，她表示銷情理想，宣布在11月29日加開一場。她預告服裝將甚有「睇頭」，近日正積極操弗備戰：「有啲透視裝冇得遮，我要將最後一嚿腹肌練出嚟，到時會有狂野啲嘅辣身舞。」為免老公呷醋，她笑言屆時會蒙住對方雙眼，問可會全裸在家中練辣舞？她笑說：「唔着會冷親，因為Part舞要做戲咁，夜晚練戲時會將老公當成道具，益晒佢啦！」
提到本月是她與老公結婚五周年的日子，Jade表示早在半年前已籌備大禮給老公：「我去世界各地搵咗好耐，最後搵到個大師喺行李篋上畫個Iron Man畀佢。」
關心妍笑言在家練舞時會將老公當道具。
2014年10月10日 頭條日報 心妍個唱加一場 預告歌衫有睇頭
心妍個唱加一場 預告歌衫有睇頭
2014年10月10日
關心妍（Jade，見圖）昨日到電台宣傳下月舉行的演唱會，即時宣佈加開一場，她笑言正努力操fit，務求以最佳狀態示人，「歌衫會好有睇頭，其中一Part是C12環節，到時會有辣身舞。（有冇事先講畀老公知？）或者到時蒙住佢對眼，其實我依家夜晚屋企都會化身C12，比較狂野同癲喪。（老公夜晚好開心？）要問佢先知，佢坐定定睇就可以。」Jade又透露10月是拍拖和結婚周年紀念月，但忙於籌備個唱，無暇食飯慶祝，故已送了一個畫有Iron Man公仔的行李箱給老公，但他未回禮，估計老公想給她驚喜。
2014年10月9曰 蘋果日報 即時娛樂 關心妍開騷會跳辣身舞：畀多啲嘢大家睇
關心妍（Jade）今日去到商台宣傳下月舉行嘅演唱會，佢宣佈個唱加開29日一場，合共兩場。Jade笑言今次會遵守承諾，服飾方面會多啲「睇頭」，佢話：「到時會有啲透視，畀多啲嘢大家睇，但到時冇得遮，所以o依家要積極減肥，希望練埋最後一塊腹肌！」Jade又透露會跳辣身舞：「尺度未知，不過應該係老公未見過。」
今個月係Jade同老公結婚5周年嘅大日子，但為籌備演唱會要押後慶祝，佢話：「半年前喺日本搵個繪畫大師，喺個喼上面畫個Iron man送畀老公，但係我仲未收佢送禮物！」
人妻關心妍開騷，話「畀多啲嘢大家睇」。
2014年10月3日 東方日報 關心妍操肌逼老公Deep V
歌手關心妍（Jade）和方皓玟前晚為無綫節目《勁歌金曲》進行錄影。以露腰裝上陣的關心妍透露即將舉行音樂會，揚言要找型男為音樂會擔任嘉賓，並指已邀請兩位神秘型男助陣，她又sweet爆表示「揀仔」行動是不需老公過目，她說：「唔使佢揀，佢揀就個個都唔啱㗎喇。我同佢講如果唔畀我揀，就要佢一齊上嚟做嘉賓，咁佢就叫我揀，因為佢好驚上台。」
地獄式訓練
問到音樂會的性感歌衫，會否受到老公的限制？她笑稱要老公齊齊Deep V示人，她說：「老公着重靚唔靚，依家都要一齊練腹肌，到時我着得性感，佢都要着Deep V西裝到場，不過機會好微。」問到屆時會否展示馬甲線？她說：「依家練咗四舊腹肌，之後仲要地獄式訓練！」
方皓玟出碟
同場歌手方皓玟透露已有一段時間沒有到電視城，今次會在節目中宣傳以分手為題的新歌，她說：「今次自己作曲、作詞感覺好fresh！（講分手經歷？）係，我想寫啲正能量嘅歌。」方皓玟又表示將與葛民輝合作拍攝微電影，年底更會推出新碟及舉行音樂會。問到邀請何人擔任音樂會嘉賓？她說：「未有計劃，現階段希望專心做好音樂為先。」
文：影視組
關心妍透露已練了四舊腹肌，更考慮要老公Deep V撐場。