2012年10月1曰 明報 關心妍10年變臉 全靠心善則美

與祖藍獲頒傑青

【明報專訊】做善事真的可以相由心生,心善則美,愈變愈靚?新鮮出爐傑出青年關心妍,被指近年靜靜加入樣貌大改造行列,出道10年由入行的包包面,變成現在的鵝蛋V臉,她更被形容為翻版Angelababy(楊穎)。不過,她未有受變臉傳聞影響,昨日在丈夫楊長智陪伴下出席「十大傑青記者會」,並笑言老公指她若似Baby是「執到」,因為兩人年紀相差10歲。

「十大傑出青年選舉2012」昨日公布名單,今屆共有8人獲選,其中兩位是藝人關心妍、王祖藍。兩人的「另一半」關心妍丈夫楊長智、王祖藍女友李亞男到場支持,今次獲選因為兩人在工作上有傑出成就,並為改進社會付出承擔。

老公笑指似Baby後生有着數

「心善則美」這句話在關心妍身上體現,她從2002年出道至今剛好10年,樣貌逐漸蛻變,尤其去年包包面逐漸變V,加上她為舉行演唱會而減肥,臉形更為瘦削,近日被形容愈變愈似Angelababy。關心妍昨日解釋:「可能當日造型惹人誤會,我穿上小鳳仙裝不能笑,或許才惹來錯覺,我覺得不像,Baby比我漂亮得多。老公說我着數了,因為我們的年紀相差10年(關心妍今年33歲,Baby 23歲),每次推出唱片都有這些傳聞,我習慣了,讚我靚,無論怎樣都是好事。」

關心妍出道最初兩年一直順利,不過自從舉行紅館個唱後,卻跌入人生谷底,令她反而有時間做義工。過去8年,她積極投入義務工作,以歌手的知名度與起跌經歷,幫助誤入歧途的青少年;她服務不同慈善團體,在香港、內地、美加與大馬等地宣揚正面信息,活動次數逾300次。

做義工逾300次

關心妍獲老公及媽媽到場支持,她表示2004年的低潮期似是上天的指示,讓她多參與社區活動,8年間盡力做義工回饋社會,從沒想過得獎,故要感謝幫助過她的人。問到如何慶祝?關心妍說:「中秋節難得一天假期,會跟家人吃團年飯。由男友到現在老公,他都沒有埋怨放棄假日私人時間,出錢出力陪我做義工,夫婦同心好重要,這個獎有一半是屬於他。」

記者:陳釗

2012年10月1曰   明報 a

昨日——關心妍由10年前包包面變成現今的鵝蛋V臉,果真心善則美。(攝影/記者:陳釗)

2012年10月1曰   明報 b

關心妍獲丈夫及母親出席支持。(攝影/記者:陳釗)

 

2012年8月31日 太陽報 關心妍借錢冇回頭

關心妍下嫁身家豐厚的金融才俊楊長智後,「升呢」成為3億闊太,有傳疏財仗義的她經常低調接濟財困藝人。她承認曾借出逾10萬元助人渡難關,至今僅收回一半借款,但不覺得被搵笨,只當給受惠者一個祝福。

早年傳我出錢幫助圈中失業教友,好似裕美、張致恒(Steven)同前歌手梁雨恩等,我想講,事實係我哋幾位教友,成立咗一個類似基金嘅會,邊位朋友有需要用錢,或者邊位開騷要送花籃,又或者係大家一齊聚會嘅飯錢,都可以動用呢筆錢。而呢筆錢嘅來源,全部係我哋做完Show、出Event所得嘅酬勞,數目唔係好大,只係一份小小心意,目的係幫助大家解燃眉之急。

自認玩義氣

令我開心嘅係接受過幫助嘅朋友,依家人人有工做,唔再需要基金嘅幫助,但我最唔明係點解出面硬係話我出錢,講到我好似好有錢咁,其實我唔係囉!坦白講,呢幾年的確一路有借錢畀圈外、圈內嘅朋友,數目唔算多,只係6位數字,但佢哋唔係親口問我借,只係我同佢哋傾偈時,知道佢哋有困難,就會好自動問佢哋:「使唔使幫手?」借出去嘅錢,我從來冇預人哋還,我認我係玩義氣嗰隻,況且我唔係等錢使。

有啲人又問我,怕唔怕有人存心呃錢?我真係冇諗過呢個問題,可以作一個咁大藉口呃我少少錢,咪畀人呃一次囉!樂觀啲去睇,畀人呃得多,下次咪會醒啲囉!至於借出嘅錢,的確有啲人係一借冇回頭,甚至失埋蹤,借出嘅6位數,我只收番一半,但我一啲都唔嬲,只係當一個祝福,但藝人朋友全部都有還錢嘅。(全文完)

後記:以耐性戰小三

跟關心妍提起老公楊長智,她必會面露甜笑,滔滔不絕大談與老公的趣事,問到假設老公在十多二十年後真的有外遇,她會如何自處?她以堅定的口脗說:「我相信佢唔會背叛我,如果真係發生,而我又依然愛佢嘅話,我會一直等佢,直到佢回心轉意。」

音樂組

http://the-sun.on.cc/cnt/entertainment/20120831/00470_036.html

關心妍成為「楊太」後,經常與老公四出外遊,十足幸福少奶奶。

關心妍成為「楊太」後,經常與老公四出外遊,十足幸福少奶奶。

與教友關係緊密的關心妍,被傳曾借錢幫助Steven(左二)。

與教友關係緊密的關心妍,被傳曾借錢幫助Steven(左二)。

傳有份接受關心妍幫助的裕美(左),曾雙雙出埠為無綫拍特輯。

傳有份接受關心妍幫助的裕美(左),曾雙雙出埠為無綫拍特輯。

2012年8月31日   太陽報    關心妍借錢冇回頭d

2012年8月30日 太陽報 關心妍做紅娘傳愛

關心妍入行10年,擅長唱失戀慘情歌,新歌《失戀哲理》熱播後,更被歌迷封為「失戀達人」。談及感情世界,她坦言只曾跟印尼餐廳太子爺蔣翹丞(Alfred)及現任老公楊長智真正愛過,多年前傳緋聞的蕭正楠、唐文龍都是煲水新聞!

喺2002至2003年做新人時,公司安排我同蕭正楠以情侶檔姿態合唱《特別鳴謝》,傳緋聞可以講係順理成章嘅事。講真,我都幾認真對待呢段緋聞。我眼中嘅蕭正楠係個具幽默感、幾好嘅男仔,因為合作成為朋友,私下都有約出嚟玩,但一定係同Shine、EO2、Cookies、at17一大班人去飲嘢、食飯、唱卡拉OK,就算傾電話,都只係同工作有關。嗰時已經開始有狗仔隊,大家嘅事業都係剛起步,只會將個心放喺事業上,不停衝呀衝,所以就算日對夜對,都唔會對出真感情。

同唐文龍嗰單緋聞仲搞笑,佢係入行前經朋友介紹認識,大我12年,我只視佢為大哥哥。嗰張話我哋拖手嘅相,係喺入行前影嘅,實情係我哋過馬路,佢好有風度咁搭一搭我手臂,唔係拖手嗰種,對呢單緋聞,我都唔知點講好。

遇見Mr. Right唔自閉

至於Alfred係喺我事業低潮期遇上,當時我除咗拍拖外,真係冇乜嘢可以做,但我哋條情路都好難行。嗰時我只可以走內地線(唱歌),但個心仲好想搏,而佢就因為事業剛起步,大家承受好大壓力,又搵唔到一個緩衝位,我哋辛苦到想抱頭痛哭,最終因為聚少離多而決定分手。

同Alfred分開後,事業、愛情兩失意,我有年幾時間匿埋喺屋企,就算朋友約出街,我都寧願玩自閉,多得嗰時幫我監製唱片嘅蔡一智成日「逼」我出街,拉我去食飯,仲介紹咗依家嘅老公畀我識,幫我製造機會,結果我哋開始拍拖,最後仲結埋婚,雖然有人話「唔做媒人三代好」,但我有咁幸福嘅生活,真係要多謝阿智,所以我決定將阿智嘅好事延續落去,兼任「現代版紅娘」,撮合等愛嘅人!(明日待續)

音樂組

http://the-sun.on.cc/cnt/entertainment/20120830/00470_028.html

關心妍與蕭正楠當年被打造成「情侶檔」,傳緋聞是意料中事。

關心妍與蕭正楠當年被打造成「情侶檔」,傳緋聞是意料中事。

關心妍入行前已認識唐文龍,傳緋聞只覺搞笑。

關心妍入行前已認識唐文龍,傳緋聞只覺搞笑。

2012年8月29日 太陽報 關心妍「狗」招防小三

關心妍(Jade)有個外形威猛、傳坐擁3億港元身家的富貴老公楊長智,其夫婿絕對有條件成「小三」圍攻對象,但Jade百分百信任,皆因她擁有藝人獨一無二的「御夫術」!

曾經有人問我:「Jade,你老公高大威猛,又傳有3億身家,咁佢成日要出去應酬傾生意,你點防小三呀?」我可以好坦白講防小三嘅最有效方法,就係畀老公百分百信心同自由,唔防備小三就係最好嘅方法。

我同老公有相同信仰,佢可以做到問心無愧,對得住上帝就OK啦!我唔可以24小時陪住佢,如果成日都擔心佢出面有女人,呢種心態真係好無謂,咁我夠成日出去做嘢,娛樂圈咁多靚仔,我夠有條件畀人引誘啦!

想維持一段美好婚姻關係,主要在乎信任,男人要去夜店摸住杯底傾生意係在所難免。我知老公為顧及我嘅感受,已經盡量避免去呢啲地方,但有時真係冇得推,所以我都會畀佢去,仲一定唔會連環奪命Call佢。我做娛樂圈,香港狗仔隊又咁犀利,如果我老公有乜景轟,狗仔隊實會幫我影低啦!除非離開咗香港範圍嘅啫!

索簽名定情

不知不覺結婚就快3年,諗番起第一次同老公邂逅都幾好笑!嗰次我唱完騷,蔡一智叫當時仲未係老公嘅佢拎我張碟問我攞簽名,但當時佢唔知我叫咩名,只係話:「你就係唱《你有心》嗰個女仔呀?」我心諗「幾好喎!我真係紅歌唔紅人」,第一次睇清楚佢個樣,就係我同阿智一家食飯,佢突然出現但好趕時間,大家只係傾幾句、交換電話號碼就走咗,點知隔幾日,佢主動打畀我。聽啲朋友爆料,原來佢當初見我只係扮Cool,其實佢不知幾興奮!(明日待續)

http://the-sun.on.cc/cnt/entertainment/20120829/00470_028.html

關心妍與楊長智結婚三年,一直講個「信」字,感情自然如膠似漆。

關心妍與楊長智結婚三年,一直講個「信」字,感情自然如膠似漆。

關心妍經常遇上狗仔隊追訪,難怪她笑言老公若有景轟一定斷正!

關心妍經常遇上狗仔隊追訪,難怪她笑言老公若有景轟一定斷正!

關心妍靠蔡一智(右)撮合婚姻,他還幫手做兄弟。

關心妍靠蔡一智(右)撮合婚姻,他還幫手做兄弟。

2012年8月28日 太陽報 分享搶獎瘀事 關心妍(火羅)爆

關心妍入行後甚少負面新聞,僅被傳近乎全面「修葺」的整容,另一「代表作」則是誤搶關菊英的勁歌獎座。信主後變豁達的她坦白只做過雙眼皮手術,而搶獎則是其人生中難得的經歷。

好多傳媒問我:「你係咪整咗容呀?」我唔反對整容,我承認2006年,去咗日本做過挑眼皮,但其他部位就冇執過,依家成日傳啲女星整容,其實我先係「整容始祖」囉!

至於話我個鼻高咗,塊面又瘦咗,其實只係啪骨嘅功勞,3年前,因為甩咗牙骹,識到位啪骨師傅,佢除咗幫我啪番正個牙骹外,仲話我成日揸咪,搞到條頸都奀,啪骨可以瘦面同推高個鼻,我啪咗一段時間,顴骨高咗,鼻又高咗,效果真係好得。

患「以為症」

另一個成日圍繞我嘅話題,當然係2008年喺《十大勁歌金曲頒獎禮》上,我一手搶咗關菊英個「傑出表現金獎」啦!呢件事,我覺得係好鬼火羅囉!事隔4年,我點都諗唔通點解可以錯得咁離譜,我估自己患上「以為症」,一個人成日「形」住一樣嘢時,就算唔係事實都會信以為真,我真係覺得我撞鬼。

但喺另一角度睇,呢件事令我有所得着,我可以將我呢件咁火羅嘅事同啲受到挫敗、失去自信嘅年輕人分享,每次我都未問完:「有冇睇過搶獎事件……?」已經全場爆笑,我會同佢哋講使乜怕失敗、怕瘀、有人瘀得過我咩?我喺幾百萬人面前咁樣都做得出,喺台上個個都望住我時,就一嘢搶咗人哋個獎。(明日待續)

口述:關心妍

筆錄:音樂組

 http://the-sun.on.cc/cnt/entertainment/20120828/00470_030.html

關心妍不介意與年輕人分享瘀事。

關心妍不介意與年輕人分享瘀事。

當年關心妍在頒獎禮上搶關菊英的獎座,相當尷尬。

當年關心妍在頒獎禮上搶關菊英的獎座,相當尷尬。

關心妍(左)在慶功宴上向關菊英敬酒道歉。

關心妍(左)在慶功宴上向關菊英敬酒道歉。

2012年8月27日 太陽報 關心妍試勻生仔秘方

關心妍(Jade)過去10年的人生不斷地追求,做新人時就博「上位」,冇事業就要有愛情,嫁人後就恨生B,她坦言曾遍尋各種生仔秘方,惜每每事與願違。但決心要當媽媽的她,自信夠「勤力」一定「生得出」,況且老公有心又夠力。

嚟緊10月就係我結婚3周年,傳媒朋友、密友都好關心我嘅生育問題,我承認結婚後嗰半年,真係好心急想有小朋友,所以我哋都密密試咗成半年,可惜唔成功。朋友知我恨生BB,提供咗好多五花八門嘅生仔秘方畀我,好似拉姑(狄波拉)就教我飲雞汁、夾體位,我真係有試飲雞汁,仲依足拉姑教嘅炮製方法,將整隻雞擺喺鑊度隔水蒸,齋飲蒸出嚟嘅雞汁,點知飲咗幾次,可能補得滯,喉嚨勁痛,仲感冒咗成10幾日,之後唔敢再食。中醫就話我體質唔虛,唔使咁補;至於體位,我就唔係咁信。拉姑又話如果想生女就夜晚做,生仔就朝頭早做,我同老公都好恨生女,所以我哋夜晚都會好忙o架!哈哈!

唔考慮試管嬰兒

其他朋友教我嘅方法,包括有計排卵期、話要喺嗰段時間勤力啲做,又話老公食生蠔有幫助,但我對老公好有信心,佢唔需要外在因素幫助。最得意係叫我喪行BB用品舖,話見多啲BB嘢,就會刺激到腦思維,我同老公真係有試過,結果就買咗四對波鞋、兩套衫仔。

有人又問,係咪因為我身體太差,減肥過度先「冇仔生」,我覺得唔關事囉!中醫都話我脈搏同女性周期都好正常,只要我平時飲食正常,成日Keep住做運動,令身體強健啲,生BB絕對冇問題。

我諗我仲未有(BB),可能係上帝嘅安排,亦可能係我未認認真真去實行生仔計劃,我出年先係34歲啫!對自己好有信心,如果真係唔好彩生唔到,咪領養囉!當初啱啱結婚時,我同老公都打算生一個,再領養一個,信仰教我哋,小朋友係上帝畀我哋嘅產物,如果有能力又做到嘅,點解唔去做,亦都有人問我,有冇考慮試管嬰兒,到目前為止,我未必會嘗試,呢個同我哋信仰有少少關係。

諗番轉頭,我未懷孕都係好事,一嚟我同老公啱啱結婚,感情仲係燒到興合合,婚後我哋需要時間磨合,享受一齊生活嘅二人世界,如果咁快有咗BB,可能對我哋有負面嘅影響。二嚟,做完紅館演唱會後,本來打算疊埋心水休息生BB,點知唱片老闆對我好有信心,突然話想幫我出碟,既然公司對我咁好,我都要兌現承諾完成工作,如果因為有BB而唔可以做嘢,我諗我會唔開心,覺得自己自私同不負責任。

拒做怪獸家長

講到教育問題,我同老公絕對唔係「怪獸家長」,我哋唔會催谷仔女一定要做尖子,會以活得開心為大前提。喺信仰裏面,上帝賜小朋友畀我哋係有意思,小朋友都會有獨特性格,我絕對唔會逼佢行我計劃好嘅路,如果我咁做,可能會埋沒佢嘅天分,不停逼佢讀書、學嘢,只會減少咗親子時間。(明日待續)

http://the-sun.on.cc/cnt/entertainment/20120827/00470_020.html

Jade心急生仔雖尚未成功,但信奉基督的她不考慮試管嬰兒。

Jade心急生仔雖尚未成功,但信奉基督的她不考慮試管嬰兒。

Jade出碟報答公司後,疊埋心水休息生BB。

Jade出碟報答公司後,疊埋心水休息生BB。

2012年8月27日    太陽報    關心妍試勻生仔秘方c

2012年8月25日 太陽報 關心妍「天后」遙望 這麼近那麼遠

做得歌手,有誰不想像陳奕迅和容祖兒般,做個呼風喚雨的天王天后呢?關心妍甫入行就為做天后而扭盡六壬,但就只差一站,列車終究停留在銅鑼灣,而名利卻令她幾乎萬箭穿心,驀然回首,關心妍怕了做天后,下一站是哪裏都冇所謂,但千萬不要是「天后」!

滯留銅鑼灣

若關心妍(Jade)當年成為了天后,敢寫包單她必不會嫁得那麼快,世事往往就是這麼弔詭,有得必有失,但失去之後可能得到更多。都說世上最遙遠的距離就是只差一步,Jade就是差一步未能由銅鑼灣前往下一個站(天后),為甚麼?她曾苦苦思索卻仍是想不到原委。

遙想當初入行,Jade早已有一個不成天后便成仁的想法,卻令她心靈累透:「以前做新人真係好想做到成績,上到天后嘅位置,等於每個人都希望仔女考A,冇人想Keep住攞B同C,但我不斷朝住呢個方向進發時,原來係好痛苦同好迷失o架!我唔係為咗音樂去做音樂,而係為咗做天后而去做音樂。」

人有時總會利欲熏心,就是「天后」這個目標令Jade一直往下沉:「當時我朝住呢個方向去計算好多嘢,犧牲好多,冇咗時間,仲要冇晒人生,淨係做做做做做,但又唔保證你會做到。其實好多人都係爭嗰步,但嗰步真係要睇天時地利同人和,要好有運氣同埋成件事要好配合,你先可以去到嗰步!」

樂做悲情歌后

Jade深知樂壇天后「罕見」,付出多少都是沒自己的份兒:「天后永遠都係得嗰一兩個,失落嘅就有好多個,個個都想做,有邊個唔想考頭三名o架!但係咪真係只為呢個Point去做音樂呢?做唔到係咪代表我唔係一個好歌手呢?係咪代表我唔值得人欣賞、冇晒價值呢?後尾慢慢喺信仰度搵番自己,原來人並非只為追尋名利,名利係吸引,但未必係令自己最快樂嘅事,做天后可能令你好快樂,但背後卻一殼眼淚。依家我更開心可以做到我鍾意嘅嘢,我嘅歌可以幫人治療失戀,唔係死撐,但當你到呢一刻仲去唔到又點呢?再困喺死胡同都係冇用,就等於失戀,痛苦嘅係你自己。」

誠然,當年以為天后唾手可得,但差一步卻成了糖衣毒藥,甚至令Jade患有情緒病:「真係有崩潰過,2004年開完演唱會,順理成章又近咗『天后』一步,但冇諗過開完之後會有咁多負面聲音,排山倒海咁逼近我,明明兩晚嘅紅館演唱會至少有兩萬人支持我,點解可以一晚冇晒?好唔開心,真係瞓唔着,更一度患上情緒病,唔想見人。後來因為信仰而開始諗通,要撐番起,要搵番當初做歌手嘅目標,依家你問我就算做唔成天后,仲願唔願意做音樂?我會答你做,因為我有我做音樂嘅意義!」

音樂是世界語言,Jade在這裏找到滿足感,不為做天后,更非為車與樓,而是為打開別人心扉:「有Fans同我講失戀好崩潰,乜嘢方法都試過但都治療唔到,直到佢睇我演唱會,我分享自己嘅經歷,又夾雜啲失戀歌,我話放過佢就等於放過自己,嗰刻真係好奇妙,佢真係願意放手,原來人哋最想要嘅就係你唱呢啲歌,我嘅歌聲係有治療安慰嘅作用,我知佢肯放棄都好感動,可以救一個人出火海,失戀真係好慘好痛!」

深知市場定位

說實話,除了慘情歌,Jade決不能唱別的歌,無他,因為慘情歌最適合她:「一路唱慘情歌,其實真係要轉吓歌路,人哋睇我演唱會都係鍾意聽我唱慘情歌,見過有人喺台下喊,原來失戀聽我嘅歌係會醒o架,我知個市場需要我啲咩,一轉歌路就會出事,與其係咁,不如就做個失戀達人啦,其實我都一樣由相戀到失戀再相戀先到結婚,原來唔失過戀係唔知咩叫做幸福。」

對於音樂理念,Jade說:「頭嗰幾年當然穩陣唱Pop,之後當然想尋突破先唱Jazz,跟住轉Rock,係新鮮,但完全叫好唔叫座,Support唔到我繼續做音樂,轉變唔係一隻歌去變,係要成隻碟玩另外嘅音樂,又過幾年,發覺最適合自己同人哋最受落嘅係失戀嘅情歌,每次畀歌人哋填詞,佢哋唔慘嘅歌詞都唔填畀我,喺人哋眼中,我就係一個咁嘅歌手,一開聲就係悲,唱幸福歌要錄5、6個鐘,但悲歌2個鐘就錄好,原來我好難唱到啲Sweet歌!我唱Rock歌真係賣唔到錢,出去登台冇人叫我唱呢啲歌,做任何騷都叫我唱慘情歌,要生存就要係咁,如果我可以自資去玩,咁就唔同,做乜都得,但真係錢要行先囉!」其實Jade賺不到錢又如何?有老公養嘛,生個肥肥白白的寶寶玩好過啦!

後記:人有相似

眼中的Jade是個長情的人,助手阿小已跟隨她多年,與她歷盡幾許風雨!Jade喜歡我們的英俊攝影師,要求找他拍攝今次專訪,實是美事一則。弔詭的是訪問完畢後來個大合照,竟發現阿小跟英俊攝影師眉宇間有八分相似,小記還未跟Jade說起,她已跟我說:「好似呀佢哋,所以我鍾意佢哋幫我手囉!」

專案組

http://the-sun.on.cc/cnt/entertainment/20120825/00470_055.html

機會總是留給有準備的人,但無論關心妍如何努力備戰,都未能與「天后」之名扯上關係!

機會總是留給有準備的人,但無論關心妍如何努力備戰,都未能與「天后」之名扯上關係!

在樂壇打滾多年的關心妍,早已看破名利,現在只為音樂而做音樂!

在樂壇打滾多年的關心妍,早已看破名利,現在只為音樂而做音樂!

2012年8月25日    太陽報   關心妍「天后」遙望 這麼近那麼遠c

2012年8月25日    太陽報   關心妍「天后」遙望 這麼近那麼遠d

關心妍的演唱會邀得哥哥做嘉賓。(資料圖片)

關心妍的演唱會邀得哥哥做嘉賓。(資料圖片)

完成演唱會後,關心妍更有信心衝擊「天后」。(資料圖片)

完成演唱會後,關心妍更有信心衝擊「天后」。(資料圖片)

關心妍清楚歌迷愛聽她唱慘情歌,她亦曾經唱到喊。(資料圖片)

關心妍清楚歌迷愛聽她唱慘情歌,她亦曾經唱到喊。(資料圖片)

2012年2月8日 Cosmopolitan 關心妍 八年奮戰

Fa Lam
在紅館開個唱,是每個歌星的終極夢想。二零零四年,出道只有兩年的關心妍夢想成真,無奈,美夢與惡夢原來只是一線之差。被捧上天的驕傲公主一夜之間變成投閒置散的落泊歌手,她為此而哭過、控訴過,就是不甘心中途離場,跌跌撞撞間竟又再走上了光明道路。八年後的今天,已成為幸福少婦的關心妍再戰紅館,揚言「從哪裏跌低,就從哪裏站起!」她絕非要一雪前恥、收復失地,只為在登上生育列車前,再圓念念不忘的舞台夢。

2012年2月8日   Cosmopolitan    關心妍 八年奮戰c

二零零四年,出道只有兩年的關心妍夢想成真,無奈,美夢與惡夢原來只是一線之差。

良好家庭背景 + 音樂才華 + 幸運之神眷顧,當年初出茅廬的關心妍(Jade)的確自信驕傲得起。「初入行的我,未免過分自信,但對於一個新人而言,若你缺乏那種『我真係得』的信心,就沒有可能突圍而出。」

公主變奴僕

然而,十年過去,這份驕傲早已被殘酷的現實徹底洗盡。美夢的完結亦是惡夢的開始,紅館個唱之後,Jade不單止沒有人氣颷升,反而陷入歷時兩年的事業低潮。
「個唱後不久,當時的經理人離任,我就像孤兒仔沒有人理,最初還有一百場的國內酒吧show可以唱,那陣子,我感到自己突然由一個踏上紅館、受盡萬千寵愛的公主,變成在酒吧賣唱的奴僕,感覺很難受。不過,我至少還有工作和收入。」豈料,之後Jade連酒吧show的機會也沒有。

面對突如其來的形勢逆轉,Jade的情緒幾乎失控。「那段日子,我每晚在家中痛哭,但一覺醒來,依然是沒有人找你開工。這種零工作的日子足足維持了一年,我只能靠積蓄度日,不僅沒有能力給媽媽家用,甚至連找朋友吃飯也不敢,因為我根本沒餘錢應酬。」
她痛哭、她埋怨、她控訴,為何上天給了她的名利榮耀,但轉眼間又要狠狠奪回?但她就是不死心。「我當時才醒覺,原來音樂路是這麼難走,甚至問自己是否應該轉行,但內心卻有一份莫名奇妙的堅持,但又不知道自己在堅持甚麼。」

八年後的今天,已成為幸福少婦的關心妍再戰紅館,揚言「從哪裏跌低,就從哪裏站起!」

八年後的今天,已成為幸福少婦的關心妍再戰紅館,揚言「從哪裏跌低,就從哪裏站起!」

堅守陣地得姻緣

Jade整天賦閒在家鬱鬱寡歡,一天忽然有朋友建議她做義工,她自卑地問︰「我可以嗎?」
「朋友提議我到社區中心唱歌鼓勵迷失青年及吸毒者,我卻有點猶豫。老實說,當時覺得自己一無是處,自己的心情跌至谷底,如何有能力鼓勵他人?」
然而,Jade最終也去了,在重執咪高峯的一刻,她再次感覺到自己的力量。「我唱至一半時已感觸得淚灑當場,同時亦發現自己的歌聲真的能感動人心,我並非全無價值。」
宗教信仰與當義工,助Jade捱過最艱難的歲月。等了兩年,她終於看到一點事業曙光,林姍姍成為她的新經理人,迷途的小歌手出碟有望。她一直對音樂的堅持,不僅令事業漸見起色,更為她贏得如意郎君。「如果我當初中途放棄,就不會等到林姍姍,繼而認識蔡一智,再經他認識我的丈夫。」

Miss Cool也融化

訪問期間,Jade不時把「老公」掛在嘴邊,一副甜絲絲的小鳥依人模樣,但原來昔日的Jade,是個獨立硬朗的"Miss Cool"。
Jade在單親家庭長大,父親在她七歲時離家遠走,母親是個不折不扣的女強人,她的個性,就是母親的翻版。「我自小已不相信婚姻,對男人的印象就是他們會無故跑掉。所以從前我與男性約會,是那種會跟男伴爭着結帳,拒收對方禮物的硬朗女子。」
直至遇上現任丈夫,冰山終於被融化。「他真的太好太好了,認識了他以後,我才知道原來女人太強未必快樂,相反,懂得相信依靠丈夫的女人才最幸福。」
Jade於人前人後都對丈夫體貼有加,一向「靠惡御夫」的港太,不妨虛心聽聽Jade教路。「你要一個人錫晒你,也要為對方真誠付出。難道人家真的會無怨無悔忍受一個野蠻太太?別當男人是傻瓜吧。」
綜觀演藝圈女藝人,哪管是天后影后級人馬,星光燦爛過後,也期望找得好歸宿。已覓得「筍盤」而「上岸」的Jade,縱使毋須再於樂壇戰場上奮勇衝刺,卻無意當個只懂high tea、買衫的靚太。
「即使毋須為生活奔波,也要活得有意義。於我而言,無論結婚與否,也要找些自己喜歡的事來做。天天shopping歎茶,只會令我與社會脫節,再找不到與丈夫的共同話題,生活甚是沒趣。」

B計劃變陣

誠然,Jade對音樂依然充滿熱情。為了再踏紅館,她不惜推遲生育計劃,甚至於一年前已開始keep fit,足足減掉二十三磅,這份狠勁連一眾上位姐仔亦望塵莫及。
「我剛結婚時已計劃生BB,但適逢有唱片公司接洽我,便決定把生育大計延遲至演唱會之後,畢竟這是我一直以來的夢想,我不想就此放棄。」
等了八年,Jade再踏紅館,坦言「從哪裏跌低,就從哪裏站起!」然而,她絕不是要為come back造勢,更無吐氣揚眉之感,純綷只為再圓舞台夢。
「我以前的心態是要紅要受歡迎要賺更多的錢,但當你跌過重重一跤後,就知道甚麼才令你快樂。今日的我,已經擁有最值得珍惜的人與事,再加上這個演唱會,我真的很滿足了。」且慢,再多兩個可愛的寶寶,Jade才是真正的無求!