張智霖(ChiLam)、鄭欣宜、關心妍、車婉婉等今日喺清水灣片廠拍攝《Happy Birthday生日快樂》MV，ChiLam表示今日心情好跌盪，因拍完MV之後，要去殯儀館為九十五歲仙遊嘅外婆打點，夜晚再去朋友公司嘅春茗。唔可以推春茗工作﹖ChiLam話：「唔需要，人生就係咁，而且外婆年紀都大，我哋都有心理準備，反而會向個仔講明白人會生老病死。」
關心妍透露早前放假，同老公去沖繩出席朋友婚宴，佢大呼好彩話：「返咗香港，第二日就地震，原本有諗住留多幾日喺沖繩玩，但因為要拍呢個MV，所以先冇留，真係好感恩。」佢又指自己最近肥咗五磅，亦有調理身體，所以今年會繼續進行生B大計。
問到欣宜有冇睇爸爸鄭少秋主演嘅《大時代》﹖佢話好少睇電視，但以前已經睇過，加上自己冇買股票，對數字冇乜緣份。講到欣宜早前表示戶口曾經只得廿六蚊，秋官知道後反問點解欣宜唔搵佢，欣宜話：「我大個女，要識得照顧自己。」秋官話心痛喎﹖欣宜話：「你哋唔話畀佢聽咪得囉，佢之後都有message我，仲畀咗一封大利是我。」問佢依家有收入，會唔會畀家用秋官﹖欣宜笑住話：「係咩﹖要架﹖好呀，食飯囉！」
