Category Archives: 心妍影片
2016年4月18日 蘋果日報 (即時娛樂 ) 【好快有第二胎】人妻關心妍陀B女6個多月:肥咗廿磅
結婚7年嘅人妻關心妍(Jade)同老公楊長智終於造人成功,一直恨首胎生囡囡嘅Jade,今日喺社交網興奮公告:「如願以償!好感恩!It’s a girl!」大肚婆Jade坐喺梳化笑到四萬咁口,一手摸肚、一手指住照聲波相片,攬住戴皇冠嘅粉紅色猴公仔,仲有愛犬陪喺身邊,幸福到爆!
《蘋果》致電Jade恭喜,佢就話:「真係好開心啦!因為第一胎真係想要囡囡先,所以都緊張嘅,其實我同老公都好鍾意囡囡,希望第一胎係女,如果真係好幸運地,好快有第二胎,仔都ok嘅,其實兩個都ok啦,想生囡囡嘅原因,因為我哋完全冇經驗湊BB,覺得囡囡會容易湊啲,所以我同老公係非常非常之開心,多謝大家嘅祝福。」
Jade已經懷胎6個多月,仲有幾個月囡囡就出世,Jade好幸福咁話:「佢開始踢得好犀利啦,早晚都踢,所以夜晚瞓得差少少,佢有時夜晚鍾意跳舞,自己肥咗差唔多十八至二十磅,所以0依家開始唔好食咁多嘢,要減番少少食量,希望生嘅時候,唔超過30磅,咁就最好嘞!因為以我嘅高度同磅數,BB咁係最健康嘅。」
2016年4月18日 On.cc東網 如願以償 關心妍公布佗猴女
【on.cc東網專訊】 現年36歲的歌手關心妍(Jade),與老公楊長智(Jonas)結婚七年一直恨生小朋友,今年二月她終於向外公布喜訊表示如願造人成功,並透過微博公開佗猴B的喜訊,預產期為七月底,Jade揚言想第一胎生女。
Jade剛剛透過社交網站上載一張新相片,摸着肚子的她笑容滿臉,除了與愛犬合照外,手上亦持有一隻猴子公仔,相片中更寫明「It’s a Girl」來宣布胎中性別為女兒,恭喜!恭喜!她寫下:「如願以償!好感恩!itsagirl。」
關心妍回覆《東網》時,開心表示:「知道係女好開心啦,因為我同老公一路以嚟都想要囡囡嘅,咁依家有個小公主,兩個都真係夢想成真喇!依家會為小公主預備所有嘢啦,會買啲衫仔、裙畀佢,多謝大家祝福。」
2016年4月16日 蘋果日報 【有話兒】回望7年追B痛苦似機器 關心妍For Fun得咗
有些人不想要小孩,卻無心插柳;有些人恨生小孩,但試盡方法都失望!36歲的關心妍(Jade)結婚7年,恨生B的她試過食中藥進補致心悸,又服食過不同偏方都失敗,試到夫妻感情似機器,身為女人的她覺得好內疚,原來機會不是握在手中,不是你的就不能強求,反而以just for fun心情釋放後,小孩自動來報到,當證實懷孕後,她淚光湧現攬着老公:「BB終於都嚟啦!」
撰文:余燕儀
關心妍2009年嫁給金融才俊楊長智,婚後積極造人,苦苦等了7年,BB才來報到,現懷孕5個多月的Jade憶述心路歷程:「我30歲結婚,諗過即刻有小朋友,試咗一年都唔成功,跟住簽唱片公司,擱置差唔多兩年。」2012年開完演唱會,兩夫婦又再努力:「真係好畀心機試,又食中藥,乜嘢雞湯乜嘢款式,可以試都試晒,其實係好痛苦,嗰種痛苦係去到一個地步,兩個人嘅感情咪好似機器咁!」
Jade和老公試了兩年,多次以為有了卻中空寶:「原來係呃你嘅,嗰時覺得好氣餒,大家又要互相安慰,我覺得係咪我嘅身體問題呢?係壓力問題定真係上帝畀你呢?當時我都係30幾箒,未算好大年紀,後來又開演唱會又停咗,開完後又試咗兩年,其中一年完全唔係點做嘢,只係休息同試,但都係唔得,嗰個心情係,自己覺得……好內疚,可能一個女人,覺得點解我冇嘅?點解咁難嘅?」
進補過度現心悸
為了能夠懷孕,Jade試盡各方法搞到身體出問題:「試過食好補嘅嘢,好似乜大補丸、鹿茸,後來補得太緊要,個心負荷唔到,不停心悸好辛苦,好似坐過山車跌落去嘅離心,每隔30秒就離心,要睇心臟科,照極都搵唔到原因,我惟有同佢並存,佢有佢亂咁跳,我有我繼續驚,一年之後,突然間佢自己唔跳。但嗰段時間好痛苦,老公好抗拒我再睇中醫。」
是否家人給壓力要生B?Jade說:「屋企人其實唔介意,但邊個會嫌有個孫唔好呢?好彩兩邊屋企都冇畀壓力,係我同老公好大壓力,好想快啲有,同埋嗰個鐘呢,由30歲行到36喎,剩番幾年就40,嗰個關口我形容唔到,年紀越嚟越大冇辦法。」有朋友建議人工受孕,不過Jade聽到不少失敗例子,她說:「原來機會唔係掌握我哋手中,嗰刻我覺得原來係你就係你,唔係你就冇得好強求。」
去年開完澳門演唱會,Jade趁有空閒再試造人:「我同老公講just for fun,不如又試吓囉,大家可能放鬆咗心情,知道就算用乜嘢方法,都係整定嘅,就算做十次人工受孕,補足十年都可以冇,可能咁樣我哋有個釋放,直至自己驗時知道有咗,嗰吓好怪,我哋好開心,但又打定輸數,因為我哋經歷太多次兩條線,唔敢替大家太開心,因為當最後唔係,兩個就好失落。」
跪地拖媽咪報喜
隔了一個月,兩人找醫生檢查:「嘩!有咗,嗰刻我哋係『Wow!』形容唔到心情,係難以置信,問老公見唔見到心跳嗰一點?BB終於都嚟啦!好似中獎,好大禮物,淚光湧現,我哋好開心,唔相信係真,呢件事等咗7年,試過好多經歷,終於真係喺度!」由於當時未夠三個月,不敢公開懷孕消息:「秘密真係守得好辛苦,孕婦嘔吐乜都嚟晒,但我又要做騷又頒獎禮,我直情攬住廁所嘔,所以到兩個月零三個禮拜,真係好穩定先話畀屋企人知,老爺奶奶開心到不得了。」
關媽媽開心到流淚,Jade說:「我跪喺地下拖住媽咪,講畀佢知我有咗,我未講自己都喊,媽咪喊到黐咗線,好感動!有段時間佢講反話安慰我:『算啦,唔好生啦!依家都好難教,兩個開心就算。』自己覺得好內疚,所以佢知我有咗,開心到難以形容。」Jade大肚後更加感受到母愛的偉大:「????家唔辛苦,但有扁頭痛,食止痛藥可能冇咁痛,但BB都會食一粒,所以我每日喺度忍。」
化妝:Cyrus
髮型:Angus Leung of Hip Hairculture
服裝:MOISELLE
2016年4月15日 香港電台第五台 — 《有趣空間:有趣星星星》
2016年4月8日 蘋果日報 (即時娛樂 ) 【獨家有片】大肚關家姐 蒙面掃2千蚊名牌家品
36歲嘅關家姐關心妍,同老公楊長智結婚7年,很想當媽媽嘅關家姐,今年終於得償所願,2月嗰時喺微博到公開懷孕喜訊,o依家已經懷孕5個多月,預產期仲同媽媽生日差唔多日子,即係大約今年7月尾。喜得猴B嘅關家姐,都未有停工,之前就為新歌《空心人》,去到老遠嘅屯門拍攝MV。今日關家姐又出動喇,但就唔係開工,係為個BB添置家品呢!
噚日下午5時許,記者發現關家姐老公楊長智獨自一人喺銅鑼灣買嘢,見佢手拎住一大袋食物,佢就好Man咁將啲食物放晒上車,但佢就未有離開銅鑼灣。跟住佢就去到一間家品連鎖店!哦!原來關家姐已經喺裏面掃緊貨喇!
腹大便便嘅關家姐,唔知係唔想人認得佢吖,定係擔心人多地方,容易受到傳染,全程戴上口罩。楊長智入到家品店後,即刻去搵老婆,仲幫佢拎住一籃戰利品,而關家姐就拎住張較輕嘅地毯。但佢哋都好似未買夠,再去睇籐籃、銀器擺設。
一個小時後,關家姐終於買完心頭好,埋單要2千幾蚊,俾錢當然係由楊生負責啦!埋單後,兩公婆就好Sweet咁,一齊行去攞車,上車後,關家姐就即刻除口罩,吸下新鮮空氣。
2016年4月6日 香港新浪娛樂專訪 影片: 唱出慘的味道 幸福媽媽關心妍
出道以來都主打慘情歌的關心妍(Jade),近年歌曲偏向勵志及玩味,以為成為幸福人妻的她會慢慢轉型,誰知剛剛懷孕的Jade反而推出她形容為近年最慘的情歌《空心人》。單聽歌名就知這歌的失落與絕望,不過人逢喜事的Jade卻仍然可唱出慘的味道,果然是「慘歌王后」!雖然唱慘情歌,但現實中她是一位幸福媽媽,懷孕中的她更表示BB未出世已被溶化,不排除日後向兒歌發展呢!
2016年4月5日 義務工作發展局宣傳短片
早前心妍與妍迷一齊參與義工服務,為一班長者慶祝生日。 義務工作發展局亦將活動拍成宣傳片,鼓勵大家多參與義工服務。
2016年4月4日 TVB 今日VIP 訪問
2016年3月31日 On.cc東網 懷胎六月 關心妍爆BB每朝六點做晨操
【on.cc東網專訊】 已懷胎六個月身孕的歌手關心妍(Jade)接受訪問,穿上黑色衫的她明顯「肚凸凸」,Jade坦言這幾天肚圍明顯幾倍數急升,令她感到有點「論盡」,而近日更開始不夠瞓,因每朝六時就被BB在肚內踢醒,BB不停動踢,像在做「晨操」。
兩公婆渴望生女
問是否已知BB性別?Jade謂:「未知,仲係復活節假同清明假,要過晒工作日先有報告出。」感覺是男還是女?她笑言:「點都話係女,希望可以話中,因為我同老公都恨女,女仔顧家啲,不過,因為肚愈嚟愈大,都開始腰痛。(帶孕婦腰封?)未需要帶住,因為我之前肚度冇乜脂肪,所以當佢漲起嚟先拉到好痛。」可有肚紋出現?Jade謂:「暫時未有,都多謝好多贊助商送嚟護膚油同cream畀我,我亦好努力搽,好痕都忍住手。」
曾考慮人工受孕
講到日前被拍到買BB床?Jade謂:「因未知性別,所以只係買咗張BB床,其他衫同奶樽都未買得住。」講到兩公婆恨生女,問是否已過奶奶一關?Jade謂:「佢有孫抱已經好開心,等咗咁耐!(之前咁耐未有,有冇諗過人工受孕?)都有考慮過,但覺得仲有時間自己試,如果四十歲前都未有就會試,好彩做完演唱會冇幾耐就有,不過,用乜嘢方法都好,調理好身體先係最緊要。」