【on.cc東網專訊】 話說大約十年前開始，網上流傳一篇叫《關心妍搞到我家姐無左份工》嘅潮文，係一名網友指自己家姐於名店做售貨員，但因為一次無法滿足顧客無理要求而被投訴，最終更被豉椒炒魷，而呢位麻煩顧客就係歌手關心妍（Jade）喇！雖然唔知故事係真定假，不過娛樂性肯定滿分，呢篇潮文其後被改咗多個唔同嘅改編惡搞版本，更令Jade自此多咗個花名叫「關家姐」，搞到Jade都百口莫辯！
Jade最近推出新歌《關家姐》，歌詞由組合農夫C君所寫，竟然就係改編自呢篇潮文，更加入呢潮文所引起嘅效應，好似提到：「還記得關家姐個趣聞最初都幾過癮 記者 去邊 去邊都訪問 答完 回頭又答 未有C1都有呢一細格」，充份體現抽水之中最高境界－「自抽」！輕快跳躍嘅節奏，配埋相當抵死嘅歌詞，真係唔知點解越聽越有畫面。
話明係自抽，歌詞更唱出Jade嘅心聲：「其實我好多新聞 都有叫你開心 不錯 就當我 讓你快樂過 『家姐』稱謂我 不必推搪太多」又就正如歌詞所講「這關家姐 這報導已將整個網絡百科覆蓋 大家厚愛 我亦會全力愛 而家姐我已經睇開」如果Jade少啲氣度相信都唱唔出呀！
網民有話兒：
魯XXX：真係何等胸襟是可以咁樣？
屢XXX：仲以為係潮文配音樂再唱！
arhXXX：望住啲歌詞，腦海聽到C君把聲唱出嚟！
一個XXX：第時佢班fans舉牌會唔會寫家姐？個名其實好親切！
何XXX：大家同唔同意關家姐潮文係以訛傳訛嘅極致？
關心妍今次做出抽水最高境界啦～真係只可以大讚佢胸襟廣闊呀！
心妍的胸襟真係好廣闊嘅！（資料圖片）
有次記者要求再拍一次佢喊，佢都一口答應再喊一次畀記者影相。（資料圖片）
佢仲有完全唔介意將自己嘅瘀事擺上枱，認真抵讚！（資
料圖片）
其實心妍都不時被拍到去名店Shopping。
