為紀念入行18年，關心妍(Jade)復出舉行《時刻觸動世界巡迴演唱會》，繼廣州站後，東莞第二站亦全場爆滿。騷前因聲帶出血 而失聲嘅Jade，見到台下歌迷嘅熱情尖叫聲，不禁感動爆喊！
撰文、圖片：東方新地
關心妍落力演唱 羅力威自言見Jade心跳會加速
巡唱第二站，Jade請來好友羅力威擔任嘉賓，平時怕怕醜醜嘅羅力威，自爆Jade一直係佢心目中嘅女神：「Jade太多歌打動我，亦影響咗我創作音樂靈感，初入行每次見到佢都心跳加速。」令在旁嘅Jade哈哈大笑話：「我嗰陣都結咗婚㗎喇，我同佢老婆（雨僑）好熟㗎！」
首次於東莞開騷嘅關心妍，特別將歌單改動，唱出歌迷喺網上投選嘅歌曲，包 括：〈負擔不起〉、〈假使我漂亮〉、〈終點〉、〈你有心〉、〈我太強〉、〈手下敗 將〉、〈放生〉等。
羅力威自爆一直視Jade為女神，指Jade啟發佢嘅創作靈感㖭！
Jade大讚羅力威彈得一手好琴，羅力威更即場為Jade以鋼琴伴奏新歌〈時刻〉，然後 兩人再合唱網路神曲〈可不可以〉。
關心妍聲帶出血失聲 淚灑東莞騷
近個唱尾聲，Jade有感而發，皆因佢開騷前兩星期突然失聲，經醫生診斷後發現佢聲帶出血，要停止練歌，連做運動都唔得，只可以閉關休息養聲，嚇到Jade不知所措：「之前好擔心，因為一班歌迷等咗我咁多年，我真係好珍惜每一場演出，所以今 日真係一個奇蹟，可以喺咁短時間內好番！今晚唱最後一首歌先敢同大家講，如果聲帶惡化可能要臨時取消，好感恩，多謝大家嘅支持，畀我嘅動力，令我把聲無事！」說罷，Jade唱出〈關心…心妍〉，再次感動爆喊！Jade又特別感謝老公：「最慘冇得黐住個女，連同佢玩都唔得，最怕傳染佢，呢幾個星期老公好辛苦，每日帶心心出街玩。」東莞站圓滿結束，嚟緊3月，Jade會將巡唱帶到澳洲及美加，尾站再返香港舉行。
Jade一氣呵成唱出多首經典金曲，幾乎每首歌都同歌迷全場大合唱，現場氣氛高漲。
見到歌迷反應熱烈，Jade開心表示：「我知道大家都係為自己嘅青春搶票，今晚等我帶大家返番去我哋嘅青春年代！」
騷前兩星期聲帶出血突然失聲，令 Jade 一度擔心要取消巡唱，幸好最終有驚無險。
