是咁的，相信大家有睇過或者聽過「關心妍搞到我家姐無左份工」呢個網絡潮文。呢篇潮文由04年一出，隨即係各大討論區瘋傳，之後有網民就推出惡搞影片，更被翻譯為英文版、日文版、俄文版等等。雖然關心妍多次否認，但係呢篇潮文依然一直喺網上出現。自此關心妍亦都多咗一個「關家姐」花名。
上年關心妍就以「C-12」名義推出名為《被注射》一曲，內容除了自抽08年同關菊英係勁歌頒獎禮發生的烏龍事件之外，更將「關家姐」潮文擺埋入呢首歌，成功引來唔少網民關注。
可能抽開有舖癮，今年關心妍索性推出一首名為《關家姐》嘅歌曲，除咗將篇潮文內容溶入歌中之外，負責填詞嘅C君更將關心妍對於呢篇潮文嘅心聲寫埋出來，好似「還記得關家姐個趣聞最初都幾過癮 ，記者去邊都訪問，答完回頭又答……篇文都經過十數年，昨晚仲有記者要whatsapp我回應。」
嘩! 歌詞認真啜核，最後仲要補多句︰「這關家姐（關家姐）這報導已將整個網絡百科覆蓋 ，大家厚愛我亦會全力愛，而家姐我已經睇開 。」
話到明睇開咗，難怪關心妍就推呢首歌自抽。話晒關心妍有兩大瘀事，今次推咗首《關家姐》，下次會唔會推首《關菊英》出來呢?
2015年6月30日 壹週Plus 家姐潮文變新歌 關心妍怒抽自己