唱片公司Neway Star早前爆出爭寵風波，被大家一致推舉為「一姐」的關心妍（Jade）卻坦言情願做「關家姐」，放棄「一姐」的寶座！而Jade近日又陷入變臉疑雲，被指有「間尺鼻」的她就以自嘲方式回應，笑指將來或會有擦膠和鉸剪的花名出現。
歌手關心妍（Jade）、鄧麗欣（Stephy）、黃淑儀、徐肇平、周國賢昨日出席活動，Jade表示自己87歲的婆婆亦有到場，又提到小時候跟對方學廚藝：「我11歲移民加拿大，之前就跟婆婆學好多嘢，佢教我切牛肉、煲湯，所以我識煮飯都係因為佢！」提到有傳同唱片公司的雨僑及鄭欣宜爭做一姐，但大家均回應指Jade才是一姐，Jade笑說：「算啦！我係關家姐，做家姐好過做一姐！呢啲新聞成日有，兩個我都欣賞，大家當新聞一則啦！」她又謂不覺得二人爭寵，因為公司非常疼錫她們。
被指變臉唔會介意
對於早前被網民指她變臉，並出現「間尺鼻」一事，Jade表示可能自己太少曝光：「又多咗個新花名，除咗間尺之外，可能又會有擦膠、鉸剪，都係笑吓啦，都咁多年，化妝唔同咗或者各樣嘢我都唔使一一解釋。我覺得樣點變都好，最緊要大家繼續聽我嘅歌！」
關心妍笑言自己係關家姐，把一姐位置留畀師妹雨僑及欣宜！