人妻關心妍（Jade）自從做咗媽媽後，一直停工專心湊寶貝囡楊榮心（Jovia），今日係心心嘅一歲快樂生日，Jade喺社交網貼抱囡食蛋糕相，感性留言：「Happy birthday #joviayang 1歲生日快樂！今朝攬住你媽咪喜極而泣因為你轉眼一歲。感謝主賜這可愛。」
原來Jade夫婦帶囡囡去咗沖繩慶祝，佢接受《蘋果》電話訪問表示：「好開心亦好感恩，心心轉眼一歲啦，我哋同咗佢嚟咗沖繩，仲有老爺奶奶一齊，大家同佢過第一次生日，想帶佢去第一次嘅旅行，畀我哋有回憶。」為咗佈置心肝寶貝嘅生日會，Jade笑言自己做咗採花賊：「我自己佈置咗backdrop畀佢，因為呢度冇特別汽球，我喺出面做採花賊，摘咗啲花佈置花花backdrop，預備咗蛋糕同佢切，所以都好開心。」
等足7年嘅Jade，去年今日終於成功生女，難怪心情特別激動：「今日攬住佢，知道佢一歲，我已經喊咗出嚟，因為真係好奇妙好感恩，呢個女兒好得意，佢都算好乖，所以好感謝上帝畀咁好嘅囡我，我好珍惜錫晒佢。」
Jade分享咗一家三口去沙灘嘅相畀《蘋果》讀者，着比堅尼嘅心心肥嘟嘟晒肚腩仔，食住手指仔個樣好可愛，Jade表示：「呢度好熱呀，諗住帶佢去沙灘，但曬得滯，根本落唔到海，惟有喺泳池同佢玩啦。」
囡囡1歲生日，關心妍同老公帶咗佢去沖繩慶祝。
仲開咗個迷你party。
囡囡Jovia仲着咗件三點式泳衣，cute爆。