【今日直擊】關心妍(Jade)和老公楊長智今日為囡囡Jovia搞百日宴，Jade的好友蒙嘉慧(YoYo)、許廷鏗、胡鴻鈞、鄭融、蔡一傑等都有出席。YoYo表示，老公鄭伊健因為在杭州開工，所以未能前來，不過她和伊健之前已探過Jovia，問現時Jovia已13磅有多，抱時是否很重手？她說：「好過癮，好得意！」問有沒有興趣生番個？她說：「好得意就得了，目前沒有這個打算！」
至於許廷鏗則表因工作太忙的關係，今次是第1次見Jovia，笑言對B女的頭髮感興趣：「我好想摸BB的頭髮，希望摸完後自己的頭髮會多一些！」
YoYo表示暫時未有計劃生「小伊健」。(攝影：梁迺楠)
YoYo寧願同伊健過二人世界。(攝影：梁迺楠)
許廷鏗和胡鴻鈞表示跟欣宜和鄭融夾錢買了件可愛衫仔給Jovia。(攝影：梁迺楠)
鄭融、蔡一傑都來睇BB。(攝影：梁迺楠)
關心妍和老公今日為囡囡搞百日宴。(攝影：梁迺楠)
【on.cc東網專訊】 歌手關心妍（Jade）今日與老公楊長智為愛女楊榮心（Jovia）舉行百日宴，關心妍接受傳媒訪問時指自己已經停餵哺人奶，她說：「我餵咗3個月，因為我本身又唔多，佢食好多奶粉，所以醫生都叫我停，話我（人奶）都唔夠畀佢。」
為咗個囡做宅女
問到關心妍老公楊長智會否好恨仔？要傳宗接代？她說：「佢鍾意囡，仔就個個爹哋都話冇所謂嘅，但如果有就梗係開心，但我未有呢個打算住，等心心大個啲先，依家都唔捨得出門口，我連街都唔係好想出，如果再多一個都唔知點算。」問到她計劃何時復出工作？她坦言目前沒有想過工作，她的工作就是湊女，她說：「佢好黐我，佢對眼不離我，我去邊佢都scan住我，變咗我都唔捨得走。佢真係認得阿媽喺邊、做緊乜，連我化妝都望實我。（你贏咗爹哋？）贏咗，佢喺爹吔身邊淨係扭，好似啲女嗲爹哋，媽咪就好需要，所以冇乜必要我都唔會出街。」
囡囡戒咗食夜奶
關心妍表示即使出外，夫婦二人都好早十二點前返到屋企，因為榮心好乖，沒有食夜奶，每晚十一點半就瞓，她說：「一瞓就瞓到朝早七點幾，所以我哋夜返，因為屋企有隻狗，butter（狗女）就不停吠，阿囡就會醒，所以兩個女搞唔掂，就唔可以去夜街，盡量12點前返，唔想囡囡食番夜奶。」
搞教育基金保囡囡一生
問到夫婦二人送了甚麼大禮給囡囡？關心妍說：「買咗保險畀佢，好多朋友都話好緊要，同埋要整一個第日讀書嘅教育基金畀佢，最緊要係教育，咩都係假，呢兩樣係保佢一生，我哋投資晒落去，今日收到親友啲禮物、禮金，禮金我就會捐咗去我『妍亮生命基金』，我一開始呢個基金就有咗佢，只係去咗幾十間學校就停咗，因為你搞到媽咪基金停咗，將你收到嘅利是捐畀有需要嘅學生，明年等BB大啲嘅時候，我就開始番基金工作。（幫囡囡買嘅保險額好大？）都大㗎，都要供㗎，原來供小朋友都要好多錢，要老公畀心機搵錢。」
自爆上圍3「cup」跳！
現場見到關心妍身型比之前豐腴，她坦言努力瘦了8磅，仲差10磅，她說：「其實我佗住佢時肥咗30磅，生咗之後減番啲，坐月要坐得好，我係食咗5kg米，變咗個飯桶，食咗個半月，我佗佢唔肥，點知坐月坐到好肥，真係辛苦，因為開刀唔可以太快做運動。開演唱會時係110磅，依家仲差幾磅，對我嚟講係肥咗好多。（上圍升cup？）呢個唔好提，係從來冇跌過，冇跌過之餘原來真係會升，人哋話好嘅，我唔使要咁厲害，我希望減番啲啲，我差不多升咗3個cup，原來餵人奶係好厲害，我覺得唔需要咁多。」聽到記者笑她老公應該好開心，她怕醜得哈哈大笑。
今日佢着到咁密實，唔知係咪刻意遮一遮個身材呢？
因為餵人奶，所以佢嘅上圍都跟住升！
仲令到佢上圍3「cup」跳㖭！
佢依家努力減咗8磅，不過仲差10磅，加油呀～～
唔知佢下次見人會唔會順便晒吓個身材呢？！
【on.cc東網專訊】 歌手關心妍（Jade）今日與老公楊長智為愛女楊榮心（Jovia）舉行百日宴，一家三口見傳媒時Jovia乖乖未有喊，不過就周身郁，之後楊長智抱B女返去休息，Jade獨自受訪說：「好緊張，因為自己結婚都冇喺香港搞，所以今日搞兩場慶祝，又驚BB喊又驚佢瞓覺，好彩佢都好冷靜好乖。」
古巨基幫手做設計
百日宴場布置以粉色為主，中間有巨型吹氣熊仔，原來是古巨基設計，關心妍說：「多謝基仔，因為佢畀咗好多心機去諗構思，呢隻bear bear特別訂造，囡囡叫做榮心，所以以心心做主題，真係要衷心多謝佢，同埋基仔又幫手設計咗朱古力做回禮禮物，既簡單又難忘，心心見到（指巨型bear bear）擘到對眼好大，我哋自己好鍾意！（用咗幾多錢？）我自己唔知，因為唔係我負責製作，係我老公，我主力湊BB，唔知幾多，本身係諗住好簡單，但一生人一次，等咗咁耐，同埋七年前我結婚，唔係香港搞，連呢個場地都係夾硬搶番嚟，因為年尾好多人搞婚宴，都好倉猝，因為半年前開始籌備，搵場地搵咗好耐，啲人話其實一年前就要預訂。」
囡囡依家13磅重
關心妍的百日宴分中午自助餐宴請親友，下午就酒會形式招待雙方好友，她說：「中午有12圍，cocktail有好幾百人，所以好着重（影）相位，個布置要畀到like感覺。」Jade都特別為囡囡挑選了一條心心裙，她說：「條裙3個月已經買咗，條裙係6個月大着，但佢長得好快，本身係好長嘅裙，但依家好似變咗短裙！（BB依家幾重？）13磅幾。（有冇諗住快啲追多過？）（榮心）追咗7年先追到。（今次可能好快？）係咪架，我唔敢，一諗起追呢個過程，你哋同我一齊追咗咁耐，我驚一start呢件事唔知追幾耐，我冇咗有呢個打算，不過順其自然嚟就梗係好啦，但一有又係嗰啲好緊張，又驚等太耐，依家都老，所以再等多7年唔知有冇得生，所以依家好感恩，湊好呢個已經好好。」
關心妍唔敢諗追B，話湊好心心已經好好！
心心好可愛呀！
關心妍話今次呢個場都係爭番嚟，媽媽唔易做呀！
今次場地布置，係古巨基幫手設計架！
回禮朱古力！
辛苦晒基仔喇！
【on.cc東網專訊】 歌手關心妍（Jade）於7月誕下囡囡後，話咁快已經3個多月喇，今日Jade與老公楊長智就在中環一酒店為愛女楊榮心（Jovia）舉行百日宴，現場布置充滿童真，以白色及粉紅色為主，中間有巨型吹氣熊仔，旁邊有勁多心心氣球，睇嚟Jade落重本搞呢個百日宴，Jade仲貼心將百日宴分兩場舉行，先有自助午餐宴請親友，下午則以酒會形式招待好友，見Jade抱住囡囡同老公一齊切蛋糕，Jovia眼仔睩睩嘴嘟嘟十分可愛，一家三口十分幸福。
Jovia好合作冇瞓覺豬呀！
個巨型吹氣熊仔勁搶鏡。
Jovia眼仔睩睩好可愛。
一齊切蛋糕，場面溫馨。
【on.cc東網專訊】 歌手關心妍（Jade）早前生咗囡囡楊榮心，身為好友的張栢芝今日就帶埋兩個仔Lucas同Quintus去探BB，栢芝的官方微博上載咗幾張合照，見栢芝抱起榮心手勢純熟，果然係兩子嘅媽媽，而關心妍就抱起自己隻狗仔，Lucas同Quintus兩兄弟高咗好多，仲愈大愈似樣。
探BB當然要準備禮物啦，不過栢芝就唔係送衫仔、嬰兒用品呢啲行貨，而係自己親手畫咗一幅BB油畫送畀關心妍同佢囡囡，真係特別得嚟又溫馨。
栢芝寶刀未老，抱B手勢好正宗。
似乎Lucas（中）同Quintus（左）都有禮物收。
栢芝抱咗榮心，心妍只好抱狗。
栢芝親手畫咗幅油畫畀關心妍，又幾特別喎！
榮心都望住栢芝姨姨，心諗邊個嚟呢？
關心妍（Jade）上星期六剖腹誕下女兒楊榮心（Jovia），住院6日後，今日Jade老公楊長智到養和醫院接母女出院，Jovia一直瞓喺BB籃入面覺覺豬，見佢臉蛋嘴唇紅卜卜，十分可愛。
講到囡囡，Jade就笑Jovia十足馬騮仔咁：「囡囡起初似我，慢慢就似爹哋，尤其一對酒凹，佢好多頭髮，本身今日諗住戴帽出院，但佢咁多頭髮都唔使戴，的水好長，長到要剪，真係monkey。」
Jade仲話o依家堅持餵哺全母乳，希望可以「長期作戰」，餵得越耐越好，o依家兩個鐘就要餵奶一次，而照顧Jovia唔會假手於人，呢幾日都係兩公婆輪流照顧，問佢係咪會為BB休息較長時間？佢話：「應該一整年，上晒手先，做嘢遲啲先，BB緊要。」
攝影：陳順禎
關心妍老公楊長智今日到養和醫院接Jade兩母女出院。
大批傳媒等候。
Jade今日精神奕奕咁出院。
Jovia瞓喺BB籃入面熟睡。
Jade話開頭囡囡似佢多啲，o依家就似爸爸。
猴年出世嘅Jovia，阿Jade話佢十足馬騮仔咁。
【on.cc東網專訊】 結婚7年的歌手關心妍（Jade）終於在上周六（7月23日）在社交網站宣布剖腹誕下B女楊榮心（Jovia），並上載一張愛女腳仔相，休息多日的Jade在老公楊長智陪同下出院，穿上白色衫、黑長褲襯涼鞋的Jade拖實老公，而老公右手抽住睡在藤籃中的Jovia，一家三合大方企定定合照，細心的楊長智先與愛女上車，留待老婆獨自面對傳媒，出世不足一周的Jovia明顯勁多頭髮。
本來想順產
Jade受訪時透露傷口仍有點痛，她說：「少少痛，依家仲食緊止痛藥，原本諗住自己生，不過預產期到都未有穿羊水，所以先開刀。」Jade坦言每日瞓得少，她說：「因為全程餵母乳，所以隔兩、三個鐘頭就要餵。（有人奶？）之前好乖去咗上堂，會做功課按摩吓。（叫老公按摩？）唔得㗎。」隨即表示飲了不少谷奶湯，她說：「醫生都話進展良好，兩、三日就上到奶。（係咪餵到冇奶出？）未決定，遲啲先算，會一路試，因為唔簡單。（出街依然餵人奶？）會喺屋企餵完先出去，又或者用冰袋帶啲出去，如果有需要都會去商場餵人奶地方餵。」
BB係大禮好感恩
Jade表示最愛囡囡有兩個酒粒，她說：「真係好得意，頭髮好長，成隻馬騮仔咁，返到屋企會幫佢剪吓的水。（會唔會幫佢剷光頭？）諗緊，驚剷完唔生到時佢追瘦我。」問到老公有否送禮？Jade說：「冇，BB已經係好大份嘅禮物，最緊要健康，原本尋日出院，但因為佢太黃可能要照燈，不過尋日食足全日人奶就冇事。」問到是否識幫BB沖涼？Jade說：「返去先算，我哋兩公婆都OK，亦有陪月，但我唔想假手於人。（追多個？）啱啱先生完，都等咗七年，已經好感恩，再有當然好啦。」
停工照顧BB
Jade踢爆老公詐型，她說：「我尋日同佢講，好開心可以廿四小時陪住BB，點知老公就話妳冇試過咁樣同我講，終於明白做人父母嘅感動。」問到是否因為休息而停工？Jade承認說：「整年唔做嘢住。（妳同Neway合約好似快完？）做嘢遲啲再算啦。」
關心妍今日與BB出院喇！
老公楊長智全程拖實老婆，又負責攞BB籃。
關心妍話本來係尋日出院，但因為BB有黃所以推遲今日出。
榮升爸爸的楊長智笑得好開心。
一家三口，幾時變一家四口呀？
睇佢哋嘅笑容都感受到幸福。
BB瞓得好甜。
睇相都見到佢好多頭髮呀！
心妍話飲咗好多谷奶湯水，等BB有充足糧食。
原來爸爸都有兩個酒粒，唔通囡囡係遺傳爸爸嘅？
等咗7年先播到種，關心妍生b之前已經做足功課，學定點增奶，確保囡囡出世唔怕餓親，因為媽媽是有練過的。
其實都唔做咁擔心，阿Jade喺大肚前，上圍已經唔錯，使乜驚。
辛苦都堅持餵人奶，好多星媽都係咁做。
官恩娜餵人奶受盡白眼，俾人投訴兼侮辱，不過為咗囝囝可以肥肥白易，少少流言蜚語算得係咩。
梁詠琪生咗Sofia寧願唔修身，都堅持餵人奶，如果出埠做嘢，就揼晒先走。
岑潔儀亦試過喺茶樓餵奶，俾女茶客歧視，大家都係女人，相煎何太急呢？
