相信不少讀者也知道，《靜默的革命》其中一位常客關心妍（Jade）幾個月前開心公告自己陀B的喜訊，林牧師當然不能放過機會，要在節目親口恭喜這位準媽媽啦！
一直都計劃與老公生兒育女的Jade，結婚7年來多次失望，直至今年2月她終於得償所願懷孕，人人也替她高興。不過，原來她見到驗孕棒上的兩條紅線時，並未特別興奮，「我哋已經食咗無數次詐胡，驗嗰時係有，但隔咗一個月又冇喎。因為就算支棒話有，只係代表你荷爾蒙話有懷孕指數，係受咗孕，但嗰個胚胎係咪可以着到牀呢？要1個月後先知。」直至最近一次，Jade驗完又驗還是陽性結果，兩夫婦才去見婦科醫生，「失望過咁多次，所以我同老公本身都唔敢表現太開心，直至睇醫生見到個Mon上面有一點，先真係夠膽喜悅！」
苦等多年終守得雲開，Jade與老公當然高興，但其實兩人心裏經歷了多次掙扎，亦因難以成孕而承受過莫大心理壓力，「呢7年好多人畀唔同嘅配方我，啲人建議我飲雞汁補身、用中藥調理、針灸同戒口乜都有，去到最盡甚至諗過人工受孕。」有一段時間她不停鑽牛角尖，甚至想了很多極端的問題，「我問神，點解咁難嘅呢？我係咪要領養？我係咪唔會有自己小朋友？」Jade做義工時接觸過很多孤兒，很想幫助他們，而老公亦不介意領養孩子，不過由於身邊朋友領養後出現問題，加上家中長輩認為兩夫婦要有自己所出，令Jade不得不再次思前想後，靠禱告求神再指引方向，最後終於在適當時機與老公孕育出愛情結晶品。
其實要養育小朋友，最重要的並非領養還是親生，而是背後所負載的一份責任感，各位有意為人父母者，切記要考慮清楚呢！
《靜默的革命》
主持：林以諾 嘉賓：關心妍
播出時間：逢星期日晚上十一點半至凌晨兩點
播放頻道：商業一台雷霆881
