將為人母的關心妍（Jade）在上集《靜默的革命》講到早年陀B食詐胡的經歷，如今她得償所願，預計兩個月後B女就會來到這個世界。為迎接弄瓦之喜，Jade亦不敢偷懶，悉心作好準備。
一般人都以「照超聲波」得知BB性別，不過原來Jade用了近年新興的驗DNA方法，準繩度會更高，「驗到話99.9%係女，其實驗DNA仲可以驗埋健康狀況正唔正常。我老公好鍾意女，之前仲講笑話如果生仔就唔使特登做櫃，畀啲膠盒佢就得，因為老竇覺得男仔要Tough啲，哈哈！」由於Jade兩夫婦沒有湊B經驗，所以幾個月前已請好陪月員，又勤力刨書了解小生命每星期的變化。很多準媽媽都會上產前課程，但Jade就沒有上堂，反而覺得更重要的是預約牀位開刀，「臨時走入去生真係可能冇位，好多朋友想自然生，但痛咗十幾廿個鐘，醫生話BB開始危險要開刀，咁就會痛Double，呢樣嘢真係嚇到我。」
全力迎接新生命的Jade已經停工，她覺得陀B沒有想像中辛苦，時間亦過得比預期快。Jade小心翼翼保護腹中塊肉，就連飲食習慣都變得清淡，就像吃減肥餐一樣，「食烚雞蛋、烚雞肉同烚菜，又驚妊娠糖尿又驚肥，因為最多只可以肥30磅，我已經肥咗20磅。之後兩個月係會最肚餓，其實BB卡路里已經夠，如果我再不停食會肥到4、50磅，所以一肚餓就惟有狂飲水，真係減肥都冇咁痛苦！」除此之外，為BB改名亦令不少新手父母很頭痕，Jade透露B女要跟父親族譜採用「榮」字，但因為聖經有榮耀、榮美等字眼，所以並不困難，不過改英文名難度就較高，「我想佢跟我同老公一樣用“J”字頭，但係又想要啲冷門啲或者自己設計嘅名，真係要花啲心機改。」如果讀者有任何提議的話，不妨告訴Jade啊！
《靜默的革命》
主持︰林以諾
播出時間：逢星期日晚上十一點半至凌晨兩點
播放頻道：商業一台雷霆 881
嘉賓：關心妍
