Category Archives: 心妍新聞

【明報專訊】關心妍（Jade）今年7月誕下囡囡楊榮心（Jovia），昨日家人為她舉辦百日宴，分上下半場宴請親戚及朋友，B女Jovia頭髮濃密、眼仔睩睩，非常可愛，難怪媽媽都不捨離開她，暫時未打算復出。

基仔負責場地設計

Jovia的百日宴昨日在四季酒店舉行，中午設12圍宴請親戚，隨後下半場是朋友的酒會派對，場地以粉紅色為主，場內擺設一隻粉紅色巨型吹氣熊仔，兩旁有不少心形汽球。Jade跟老公楊長智抱住Jovia見傳媒，Jovia頭髮濃密，戴住心心頭箍，服飾都跟媽媽襯到絕，面對閃光燈處變不驚，非常可愛。Jade接受訪問時表示百日宴籌備良久，感激好友古巨基負責場地設計，她說﹕「因為囡囡叫榮心，所以整個場地都以心心為主題，基仔也為我們設計回禮的朱古力。（百日宴花費多少？）不知，我只顧照顧女兒，製作費方面由老公負責。」她透露囡囡Jovia現時13磅多，但身形長，原本長裙都變短裙。問到會否再追？Jade說﹕「這個追7年才有，我想都不敢想，順其自然就好，現在都老了，再老7年都不知還生不生到，等心心長大一點再作考慮。」雖然囡囡滿3個月後已停止餵哺母乳，但Jade的上圍仍比未懷孕時大3個Cup，她說暫時減去8磅，但距離目標還有10磅，會慢慢做運動回復身形。

Jade直言沒想過工作的事，因為囡囡好黐身，眼神總離不開媽媽，所以連出門都不捨得，反而老公楊長智抱抱這個前世情人時就會撒嬌扭計。Jade表示成立「妍亮生命慈善基金」後不久就懷孕，探訪工作被迫叫停，故今次宴會收到的禮金，將會捐到基金幫忙有困難的小朋友。

蒙嘉慧無生育計劃

百日宴邀請了不少圈中朋友出席，包括古巨基與太太Lorraine、蔡一智一家、蔡一傑、許廷鏗、蒙嘉慧、胡鴻鈞及鄭融等。蒙嘉慧表示跟老公鄭伊健都抱過Jovia，非常可愛，但自己暫沒有生育的打算。

記者﹕楊安莉
攝影﹕梁迺楠

關心妍專心湊女，暫時未有復出打算。（攝影﹕梁迺楠）

Jovia頭髮濃密、眼仔睩睩，萌爆。

蔡一智全家到賀，與關心妍一家三口合照。

百日宴場內擺設一隻粉紅色巨型吹氣熊仔，兩旁有不少心形汽球。

蒙嘉慧抱過Jovia，大讚B女可愛。（攝影﹕梁迺楠）

現年37歲的關心妍（Jade），今年7月為老公楊長智誕下小公主楊榮心（Jovia），停工全職湊女的Jade，昨日在中環四季酒店舉行一連兩場的百日宴，上午安排親友吃自助餐，下午則以酒會形式招待朋友，出席藝人包括古巨基婦夫、蔡一傑、許廷鏗、蒙嘉慧、鄭融、康子妮及胡鴻鈞等等，面對傳媒，B女不停打喊露，又眼仔睩睩，非常可愛。

Jade指百日宴籌備了半年，心情有點緊張，皆因自己沒有在香港辦婚禮，同時又自爆瘦了8磅，但上圍則升了三cup。Jade說：「今次嘅場地佈置由古巨基構思，全部用咗幾多錢就唔知，呢個係老公負責。」

未諗復工

問Jade會否再追仔？她指老公都喜歡囡囡，但現在不敢講追多一個，笑指這次都等了7年，追多個是好深的課題。Jade笑謂：「我老喇，再等7年唔知仲有冇得生。」至於何時會有新工作？Jade表示還未想這個問題，現在每日湊女，囡囡很黐她，自己與老公都不捨得離開屋企太長時間。
昨日不少嘉賓送禮物或禮金予囡囡，Jade表示會捐給自己創辦的「姸亮生命慈善基金」。至於她又送了甚麼禮物給囡囡？Jade說：「佢仲有10幾日就4個月，同佢買咗保險，仲有讀書基金，呢兩樣都好重要。」另外，單拖現身的蒙嘉慧指之前已見過BB女，覺得好過癮，但自己未有生B打算，見她身形略為纖瘦，問是否減肥成功？她只表示瘦了一點點，仍需努力。

採訪：王連連
攝影：仇志德

關心妍與老公昨日為囡囡搞百日宴，得意妹玩足半日，影相時打喊露超可愛。

關心妍囡囡尚有10多天便4個月，遺傳了媽咪有濃密的頭髮。

古巨基（左）出心出力，為關心妍囡囡百日宴構思佈置及回禮禮盒。

不少圈中人出席百日宴，還齊齊拿着B女的人形紙牌合照。

【今日直擊】關心妍(Jade)和老公楊長智今日為囡囡Jovia搞百日宴，Jade的好友蒙嘉慧(YoYo)、許廷鏗、胡鴻鈞、鄭融、蔡一傑等都有出席。YoYo表示，老公鄭伊健因為在杭州開工，所以未能前來，不過她和伊健之前已探過Jovia，問現時Jovia已13磅有多，抱時是否很重手？她說：「好過癮，好得意！」問有沒有興趣生番個？她說：「好得意就得了，目前沒有這個打算！」

至於許廷鏗則表因工作太忙的關係，今次是第1次見Jovia，笑言對B女的頭髮感興趣：「我好想摸BB的頭髮，希望摸完後自己的頭髮會多一些！」

YoYo表示暫時未有計劃生「小伊健」。(攝影：梁迺楠)

YoYo寧願同伊健過二人世界。(攝影：梁迺楠)

許廷鏗和胡鴻鈞表示跟欣宜和鄭融夾錢買了件可愛衫仔給Jovia。(攝影：梁迺楠)

鄭融、蔡一傑都來睇BB。(攝影：梁迺楠)

關心妍和老公今日為囡囡搞百日宴。(攝影：梁迺楠)

【on.cc東網專訊】 歌手關心妍（Jade）今日與老公楊長智為愛女楊榮心（Jovia）舉行百日宴，關心妍接受傳媒訪問時指自己已經停餵哺人奶，她說：「我餵咗3個月，因為我本身又唔多，佢食好多奶粉，所以醫生都叫我停，話我（人奶）都唔夠畀佢。」

為咗個囡做宅女

問到關心妍老公楊長智會否好恨仔？要傳宗接代？她說：「佢鍾意囡，仔就個個爹哋都話冇所謂嘅，但如果有就梗係開心，但我未有呢個打算住，等心心大個啲先，依家都唔捨得出門口，我連街都唔係好想出，如果再多一個都唔知點算。」問到她計劃何時復出工作？她坦言目前沒有想過工作，她的工作就是湊女，她說：「佢好黐我，佢對眼不離我，我去邊佢都scan住我，變咗我都唔捨得走。佢真係認得阿媽喺邊、做緊乜，連我化妝都望實我。（你贏咗爹哋？）贏咗，佢喺爹吔身邊淨係扭，好似啲女嗲爹哋，媽咪就好需要，所以冇乜必要我都唔會出街。」

囡囡戒咗食夜奶

關心妍表示即使出外，夫婦二人都好早十二點前返到屋企，因為榮心好乖，沒有食夜奶，每晚十一點半就瞓，她說：「一瞓就瞓到朝早七點幾，所以我哋夜返，因為屋企有隻狗，butter（狗女）就不停吠，阿囡就會醒，所以兩個女搞唔掂，就唔可以去夜街，盡量12點前返，唔想囡囡食番夜奶。」

搞教育基金保囡囡一生

問到夫婦二人送了甚麼大禮給囡囡？關心妍說：「買咗保險畀佢，好多朋友都話好緊要，同埋要整一個第日讀書嘅教育基金畀佢，最緊要係教育，咩都係假，呢兩樣係保佢一生，我哋投資晒落去，今日收到親友啲禮物、禮金，禮金我就會捐咗去我『妍亮生命基金』，我一開始呢個基金就有咗佢，只係去咗幾十間學校就停咗，因為你搞到媽咪基金停咗，將你收到嘅利是捐畀有需要嘅學生，明年等BB大啲嘅時候，我就開始番基金工作。（幫囡囡買嘅保險額好大？）都大㗎，都要供㗎，原來供小朋友都要好多錢，要老公畀心機搵錢。」

自爆上圍3「cup」跳！

現場見到關心妍身型比之前豐腴，她坦言努力瘦了8磅，仲差10磅，她說：「其實我佗住佢時肥咗30磅，生咗之後減番啲，坐月要坐得好，我係食咗5kg米，變咗個飯桶，食咗個半月，我佗佢唔肥，點知坐月坐到好肥，真係辛苦，因為開刀唔可以太快做運動。開演唱會時係110磅，依家仲差幾磅，對我嚟講係肥咗好多。（上圍升cup？）呢個唔好提，係從來冇跌過，冇跌過之餘原來真係會升，人哋話好嘅，我唔使要咁厲害，我希望減番啲啲，我差不多升咗3個cup，原來餵人奶係好厲害，我覺得唔需要咁多。」聽到記者笑她老公應該好開心，她怕醜得哈哈大笑。

今日佢着到咁密實，唔知係咪刻意遮一遮個身材呢？

因為餵人奶，所以佢嘅上圍都跟住升！

仲令到佢上圍3「cup」跳㖭！

佢依家努力減咗8磅，不過仲差10磅，加油呀～～

唔知佢下次見人會唔會順便晒吓個身材呢？！

【on.cc東網專訊】 歌手關心妍（Jade）今日與老公楊長智為愛女楊榮心（Jovia）舉行百日宴，一家三口見傳媒時Jovia乖乖未有喊，不過就周身郁，之後楊長智抱B女返去休息，Jade獨自受訪說：「好緊張，因為自己結婚都冇喺香港搞，所以今日搞兩場慶祝，又驚BB喊又驚佢瞓覺，好彩佢都好冷靜好乖。」

古巨基幫手做設計

百日宴場布置以粉色為主，中間有巨型吹氣熊仔，原來是古巨基設計，關心妍說：「多謝基仔，因為佢畀咗好多心機去諗構思，呢隻bear bear特別訂造，囡囡叫做榮心，所以以心心做主題，真係要衷心多謝佢，同埋基仔又幫手設計咗朱古力做回禮禮物，既簡單又難忘，心心見到（指巨型bear bear）擘到對眼好大，我哋自己好鍾意！（用咗幾多錢？）我自己唔知，因為唔係我負責製作，係我老公，我主力湊BB，唔知幾多，本身係諗住好簡單，但一生人一次，等咗咁耐，同埋七年前我結婚，唔係香港搞，連呢個場地都係夾硬搶番嚟，因為年尾好多人搞婚宴，都好倉猝，因為半年前開始籌備，搵場地搵咗好耐，啲人話其實一年前就要預訂。」

囡囡依家13磅重

關心妍的百日宴分中午自助餐宴請親友，下午就酒會形式招待雙方好友，她說：「中午有12圍，cocktail有好幾百人，所以好着重（影）相位，個布置要畀到like感覺。」Jade都特別為囡囡挑選了一條心心裙，她說：「條裙3個月已經買咗，條裙係6個月大着，但佢長得好快，本身係好長嘅裙，但依家好似變咗短裙！（BB依家幾重？）13磅幾。（有冇諗住快啲追多過？）（榮心）追咗7年先追到。（今次可能好快？）係咪架，我唔敢，一諗起追呢個過程，你哋同我一齊追咗咁耐，我驚一start呢件事唔知追幾耐，我冇咗有呢個打算，不過順其自然嚟就梗係好啦，但一有又係嗰啲好緊張，又驚等太耐，依家都老，所以再等多7年唔知有冇得生，所以依家好感恩，湊好呢個已經好好。」

關心妍唔敢諗追B，話湊好心心已經好好！

心心好可愛呀！

關心妍話今次呢個場都係爭番嚟，媽媽唔易做呀！

今次場地布置，係古巨基幫手設計架！

回禮朱古力！

辛苦晒基仔喇！

【on.cc東網專訊】 歌手關心妍（Jade）於7月誕下囡囡後，話咁快已經3個多月喇，今日Jade與老公楊長智就在中環一酒店為愛女楊榮心（Jovia）舉行百日宴，現場布置充滿童真，以白色及粉紅色為主，中間有巨型吹氣熊仔，旁邊有勁多心心氣球，睇嚟Jade落重本搞呢個百日宴，Jade仲貼心將百日宴分兩場舉行，先有自助午餐宴請親友，下午則以酒會形式招待好友，見Jade抱住囡囡同老公一齊切蛋糕，Jovia眼仔睩睩嘴嘟嘟十分可愛，一家三口十分幸福。

Jovia好合作冇瞓覺豬呀！

個巨型吹氣熊仔勁搶鏡。

Jovia眼仔睩睩好可愛。

一齊切蛋糕，場面溫馨。