關心妍（Jade）身穿黃色連身裙，出席灣仔會展舉行嘅《新城邁向25聲光綻放音樂會》，Jade嘅一身黃色打扮，似足《玩轉腦朋友》（Inside out）嘅阿樂，Jade笑言之前見阮小儀扮阿愁咁得意，自己都想扮阿Joy（阿樂），佢話：「0依家關家姐想令人開心，想帶畀人歡樂，因為好多朋友股災當中。」
問到佢喺朋友之間，係咪做阿樂角色？Jade表示：「都係呀，自己經歷咁多搞笑嘢，有時同朋友講，會話畀佢哋聽，我都冇事啦，因為好多朋友受股災影響，都蝕咗錢。」
咁Jade有冇蝕？佢話：「好彩我走咗，係頭一批走，如果唔係變大閘蟹，有朋友誇張，蝕咗七八位數字。（問你借錢？）未有，不過如果好friend，自己都會借，周轉唔到做傻事唔值得。」
問到股市有冇影響工作機會？Jade表示：「我呢啲不嬲都唔係極度好景嘅歌手，工作係有，但多數係返內地及海外，香港就差唔多。」
會唔會做副業保障自己？佢話：「自己做緊『妍亮基金』，就算有副業都係同社企去搞，0依家Plan緊睇下點樣畀年輕人創業，但暫時基金未請到人，自己又唔識呢啲，都好頭痛。」
其實噚晚除咗關家姐以黃色打扮亮相音樂會外，薛家燕都係一身黃氣出席。
關心妍表示想扮阿Joy，想帶畀人歡樂。
吖，家燕姐都係黃色打扮呀﹗
