2016年1月21日 蘋果日報(即時新聞 )(節錄)

鄭欣宜今日喺尖沙嘴出席佢同圈外朋友開設嘅曲奇餅店開幕,佢仲請咗關心妍、林欣彤同許廷鏗等撐場。欣宜話開呢間曲奇鋪,最初係由佢屋企個廚房開始:「最初係廚房焗曲奇,點知個朋友食完就話好好味,仲特登辭埋份工去同我開鋪頭,我哋由網上開始,到依家開咗呢間鋪。」

問到佢今次投資咗幾位數?欣宜話係商業秘密,唔肯講,但就話自己簽支票一刻手都震埋:「投資咗呢幾年工作嘅人工,簽支票時都手震,因為手太震,銀行仲彈票要的再簽過。」

由於依家只係得佢同朋友兩個投資者,所以欣宜話好歡迎有興趣嘅投資者加盟,但問到佢依家謝霆鋒、古巨基、陳敏之都搞曲奇生意,問到佢怕唔怕爭食?欣宜即話自己都好鍾意食敏之啲曲奇,又話覺得大家客路唔同,希望大家生意都好。

新鋪開張咁大件事,點解唔請爸爸鄭少秋嚟撐場?欣宜鬼馬咁話:「我特登唔請,因為想真係自己落手落腳下做呢個生意,到將來有成功佢會更開心。」佢仲話爸爸成日都會幫襯佢買曲奇餅送俾朋友,所以呢個行動已經係最大嘅支持。

同場嘅關心妍就話自己好多年前已經食過欣宜親手做嘅曲奇:「因為我同佢都係加拿大讀書,所以食到佢整嘅曲奇時,真係有種家鄉嘅味道。」講到欣宜呼籲大家可以投資入股,關心妍都話自己好有興趣:「如果佢邀請我我都有興趣,我同楊生(老公)一直都對飲食業有興趣。」

2016年01月21日   蘋果日報(即時新聞 )a

2016年01月21日   蘋果日報(即時新聞 )b

Comments are closed