2009年結婚的關心妍，多年嚟都積極造人，今日終於傳來好消息!佢喺微博放圖公佈終於懷孕了:「很想很想和大家分享這份喜悅。感謝主！ 新一年，家裡多了一位小成員呢！」
人妻關心妍喺電話向本報公告喜訊：「好開心，啱啱有咗三個半月，之前唔講得住，好多朋友都察覺唔到，證明我唔係肥好多。等咗差唔多兩年半三年，終於努力造人成功，去年十一月喺澳門開完騷，放下心頭大石努力試，十二月初有咗都唔覺，個幾月後才知，最辛苦嗰段時間接晒聖誕新年騷，嘔到不得了，大家又唔知，工作又推唔到，o依家好舒服冇嘔，BB好乖好錫我，差唔多三個月舒服晒，未知仔定女。」
Jade話懷孕兩個月時最辛苦：「食唔到嘢，不停嘔又暈，最弊接晒所有工作要開工，又唔可以話畀人知點解唔做，一日病咗就得啫，但唔可以話病成個月，公司又唔明，同事以為我腸胃炎，捱咗嗰個月好好多。」
一直恨生B嘅Jade雖然曾經諗過人工受孕，不話今次係自然受孕成功：「自己驗咗知道有，跟住去睇醫生，心情都係放鬆，等到三個半月穩定BB好健康，忍唔住同大家講，當初知道開心到喊，真係冇諗過，因為之前試咗好多時間，朋友畀好多偏方乜都試，有段時間自己都失望，唔好再諗，真係好驚喜，竟然今年就有，嗰種開心好難講，之前唔敢透露畀人知，呢啲傳統都守住，屋企人都冇講，三個月後先講，費事屋企人失望，老爺奶奶媽咪都開心得好緊要，我同老公都喊。」
Jade有咗三個半月，已經見肚，佢好開心話：「開始脹，緊身衫都着唔到。」幾時停工安胎？佢話：「因為三個月半開始穩定，醫生話可以做番嘢，不過老公禁止我唔畀着高踭鞋，我話着一吋得唔得，因為唔着唔慣，行路要好小心，唔可以跌親，可能懷孕個月停工。」
問到想生仔定女？Jade話：「真係有得揀想生女，老公同我都好鍾意女，因為哥哥有兩個仔，老公嗰邊都有仔，我哋想生個女先，家姐可以照顧細佬。o依家自己重咗6、7磅，呢排胃口正常番唔使點補，之前自己太瘦，o依家條腰冇咗，BB健康就OK，胃口暫時好好，BB好錫我，停咗嘔，又唔會成日眼瞓有番啲精神，好舒服，之前嘔咗一個月。」
之前Jade為求懷孕，不但尋求中西名醫，又試過好多偏方，佢話：「飲燉雞汁，又試過中藥、針灸、瞓熱石、飲豆漿，個個都話呢啲好，後來又聽人講飲紅棗水，飲足差唔多一年，幾乎隔日飲補番啲血，因為中藥唔可以成日食，之前中醫補得太緊要，有心悸，要睇足一年西醫，之後老公唔畀食中藥，惟有改試其他方法，夜晚日日浸腳，試咗一年，今年年尾終於成功有BB。」
Jade感恩話：「知道有BB嗰剎那，感覺真係開心到跳起，唔能夠想像，因為我哋試過太耐，好多次嘅失望，到今次有少少唔能夠相信，但就好開心，但又唔敢太開心，因為又驚唔係真，嗰個情感直至照到BB，我哋先至開心，真㗎真㗎真㗎，好似發夢一樣，有BB嘅喜樂多於任何嘢，完全形容唔到。」
恭喜恭喜!
(關心妍微博圖片)
(關心妍微博圖片)
三個半月肚
老公拖實