【on.cc東網專訊】 早前宣布有喜的關心妍（Jade）今日為新歌《空心人》拍MV，因在廢置的廠房拍攝，Jade特別帶備了消毒機在身邊，而Jade為保身子穿上黑色大長褸配上黑色波鞋，Jade明顯肚凸凸，表示已懷孕四個多月，初期亦有又嘔又暈，現在就沒有了，所以BB都好乖好錫媽媽。
狂食一個月肥10磅
講到BB性別？Jade謂：「下個月就知嘞，但我都老公都鍾意女，而公司同事都有開盤估我生仔生女。」講到上圍已明顯升級？Jade笑言：「一世人未見過咁震撼嘅畫面，冇諗過幾個月已經咁澎湃，未試過咁形容自己，依家都未到一半時間，遲啲唔知點算。」Jade承認初期都有狂食，所以一個月已肥了10磅，現已減少亂食，會注重營養。問到可有轉飲食口味？Jade謂：「鍾意食點心，所以咁快就肥咗6，7磅，依家就穩定番。（有冇凌晨突然想食嘢要老公去買？）又冇，冇咁陰功。」Jade笑言身邊朋友們都變了「懷孕警察」，不時提她這不能用，那個又不能做，而她除工作外，已經禁足不能外出，因她本身有藥物敏感，所以不能病，怕病了不能服藥。
懷孕令愛犬呷醋
問到老公是否變得好緊張？Jade表示：「佢本身係緊張嘅人，所以仲緊張。」而Jade一向有養狗狗，問可有因有BB而棄養？Jade即言：「冇呀，反而隻細狗Butter喺我有咗1、2個月時，佢好似知道我有咗，平時好聽話嘅佢就竟然亂咁喺梳化同枱底屙尿，佢應該係呷醋，我後尾同佢講媽咪有咗BB！又畀佢伏喺我肚度，之後佢就冇嘢，所以狗係好有靈性。」
關心妍為新歌《空心人》拍MV。
關心妍心情大靚。
關心妍帶埋消毒機現身。
關心妍認佗B升Cup，仲話一世人未見過咁震撼嘅畫面。
關心妍現時佗B四個幾月，着波鞋拍MV，咁就乖喇！
Jade去邊，都有扶實！
Jade透露因為懷孕初期狂食，令佢一個月肥10磅。
Jade明顯肚凸凸。
Jade透露下個月就知BB性別！
