Daily Archives: 2015-07-01

高登潮文有幾勁？之前有唔少潮文成功被拍成短片就知高登仔有幾威威啦！近日仲有高登潮文變成歌添，講緊嘅係關心妍(Jade)噚日plug嘅新歌《關家姐》呀，今日仲放埋上YouTube。 Jade今次呢首歌仲係自抽自己水，用咗04年潮文「關心妍搞到我家姐無左份工」為引子，呢首歌仲講Jade呢11年因為呢段潮文所受嘅影響。以下係部份歌詞︰

「還記得關家姐與友人去PP幫襯 
佢炆　佢忍　佢等咗一陣 
至能　名牌勁掃 
又要即刻封舖　招呼要好 」

「Sale屎驚佢冇人性關家姐個性　惡頂 
扮巨星效應　太任性　打俾公司最後決定 
要拒絕佢就算佢隔天寫信complain 」

「嗱嗱嗱其實冇邊個　只因我俾公司炒咗」

「還記得關家姐個趣聞最初都幾過癮 
記者　去邊　去邊都訪問 
答完　回頭又答　未有C1都有呢一細格 」

咁正嘅詞係由C君填嘅，之後仲有一句「其實我好多新聞　都有叫你開心　不錯」，咪即係講埋09年《勁歌》同關菊英搶獎單嘢囉。而歌詞最後仲話佢唔介意人稱呼佢做「關家姐」同睇化咗添。網友聽完後都紛紛讚好，但亦有網友話呢首歌應該早幾年出，咁就有更大迴響喎。《FACE》打去問Jade點解會推出呢首自抽歌，佢就話︰「呢隻歌其實係因為『關家姐』潮文今年10周年，好想做一首歌去畀credit(榮譽)佢，多謝所有網民呢10年一路討論關家姐，促成咗呢隻歌，多謝你哋！」

其實上年6月Jade以「C-12」名義推出其中一首歌〈被注射〉，個mv都有辣埋「關家姐」同其他潮文，而領錯獎單嘢之後被本地樂隊TONICK惡搞整咗〈關心菊英〉抽水，成功喺演唱會上邀請到關心妍做嘉賓一齊唱添，證明Jade都幾玩得。

欣賞下啲歌詞

當年Jade喺《勁歌金曲》同關菊英搶獎事件。