關心妍靜待心肝寶貝出世，問到將來會否為BB退出？她說：「可能唔係到我揀，可能佢出咗嚟，自己唔想出街呢，自己都唔知，呢個係人生新一頁。但我唔會係怪獸家長，唔會期望小朋友十項全能，我聽都辛苦啦，何況要佢做。贏在起跑線，有幾多個贏得出？咁多個城市，香港讀書最辛苦。」
對於早前發生多宗學生自殺問題，Jade坦言睇到好心痛：「有啲家長畀好大壓力小朋友，如果做唔到十項全能，就唔係合格學生，但如果香港教育係勁，應該出到好多人影響世界，暫時只係得光纖之父高錕一個，但點解外國讀書嘅人，可以創作facebook、website？」
將為人母的Jade狠批香港的教育制度：「自己做過好多禁毒青少年活動，見到正生書院學生同其他唔同，佢哋思想眼界好正面好有禮貌，佢哋唔係日日讀，而係交流、種花，可能有家長覺得無聊，不過就算補習夾硬考到A，係咪啟發到思考能力？」
搵定地方餵人奶
Jade已決定餵人奶，早前官恩娜（Ella）在酒店餵人奶被歧視，她說：「嗰件事太搞笑，唔可以相信，原來香港真係咁少哺乳地方，幾個月之後自己都要解決呢個問題，出街要問定酒店、商場有冇地方可以餵奶，希望大家畀多啲包容，你話我唔緊要，但唔好搞喊BB，真係會嚇親佢，呢樣真係容忍唔到。」
關心妍表明自己不會做怪獸家長，更指香港小朋友讀書最辛苦。
Jade日前帶腹中BB與未來表哥表姊見面，母愛盡現。互聯網圖片
官恩娜（圖）早前在酒店餵人奶被歧視，Jade希望大家給多點包容。資料圖片