Author Archives: Veronica

一提到關心妍，大家一定會聯想到「關家姐」或者「搶獎事件」，不過關心妍本人一早已對事件免疫，更製作了《關家姐》一曲自嘲，實行與民同樂，Prof J形容關心妍似足一隻重生股，雖然早幾年因為各種「惡搞、取笑」沉寂下來，但透過神秘身份“C-12”以及《關家姐》這首歌曲刺激人氣，有如重生股再次炒起。 　

編輯：何文俊、Prof J

PJ：徐燦傑(Prof J) J：關心妍

PJ：喺訪問前我申報咗先，我唔係「關家姐」嘅Fans，因為我好怕聽唔開心嘅歌，哈哈！咁經濟學上有個理論，我對每個受訪者都會用一次，就係「稀有性」。關心妍同林志美、彭羚一樣，都係從來無拍過電視劇同電影。講真，當年喺娛樂圈唔參與幕前演出，就硬係差啲曝光率，點解會咁樣呢？
J：其實唔係唔做，因為我剩係唱歌叻，咁每次有人搵我演唱會或者出碟，都要取捨，我唔想體力唔夠，又唔夠精神，令到唱Live唔好，而且做戲亦都唔係拿手，再講我唱歌又未到手到拿來嘅境界。所以我覺得唔好太貪心，做好唱歌已經好好喇。
PJ：無錯，專注唔分身。咁「關家姐」係唯一一位歌手攞到十大傑出青年同埋香港傑出義工獎，應該到依一刻都係唯一嗰位，所以都係有稀有性！你正正知道要做乜，令你喺社會企業責任上面做得更加好。而我諗到一種股票類型去形容你，叫「重生股」。
J：重生股？
PJ：即係一隻股炒過一排，大家見無乜表現就唾棄佢，鬧佢點樣點樣唔得，而當全世界都放棄佢，隻股又開始炒起。咁我知你有信仰，2009年你錄咗《愛是不保留》，我好鍾意，男歌手唱唔到你嘅情懷，之後又出咗演唱會，《失戀五步曲》亦好Hit，其後又翻唱過好多歌，而最緊要你喺重生過程搵到自己嘅「亮點」，就係喺2014年化身神秘歌手“C-12”，點解會突然諗到？
J：我哋想要新嘅感覺，因為大家會先入為主，咁要點樣令人聽我嘅歌無咗Bias先呢？所以就有“C-12”呢個神秘歌手出現，你唔好理佢係邊個，最緊要好唔好聽。
PJ：所以“C-12”係好成功嘅，而另一個重新點就係《關家姐》，呢首歌嘅歌詞正正將你喺「關家姐」事件重生。後來發現你嘅信心大咗，有返自己嘅感覺，係咪代表成熟咗，可以行前一步做得更好？
J：因為我明白呢件事無得再辯護，而對我嚟講呢件事傳咗咁耐都無咩喇，已經免疫晒所有難聽嘅說話。咁我就諗，不如我同你哋一齊玩，既然你係咪都笑我，咁不如我自嘲吓，大家又有歌聽，何樂而不為呢。
PJ：所以正正解釋到點解重生成功。而《關家姐》之後有隻歌《人生銀行》都好好，話畀人知「唔好嘅嘢拎走佢，好嘅嘢儲低」，呢樣亦都係好好嘅財富管理嘅心態。咁關家姐經歷過被人玩、被人惡搞嘅痛苦後，而將自己嘅經歷、人生，透過歌曲去同人分享，就好似「重生股」咁重新炒起啦！繼續努力啦，關心妍！

走過人生低谷 辦基金助年輕人

Y：朱明銳｜J：關心妍

關心妍入行15年，音樂路上絕不平坦，經歷過各種惡作劇、事業低潮，關心妍不但沒有氣餒，還視之為寶貴的經歷與年輕人分享，現時更出心出力發展「燃亮生命慈善基金」，透過音樂協助年輕一代。
Y：關心妍係我好鍾意嘅歌手，心妍分享吓點解咁鍾意唱歌呢？
J：我除咗鍾意唱歌，亦成日學唱歌，唱歌係可以學到七、八十歲，因為每個階段唱出嚟都唔一樣，人生經歷咗唔同事情之後，對歌詞嘅理解亦唔一樣。
Y：喺樂壇超過十五年，過去有段日子你唔衝、唔去爭，點睇嗰啲日子，會唔會好辛苦？
J：嗰段時間過得好快，依家回望返先發覺辛苦。有時發覺做歌手，尤其喺香港係好容易絕望，因為唱嚟唱去都係咁，無乜突破，但當有一兩個同我講「其實你唱得好好，堅持住」，我哋身在其中的確好需要呢啲說話，所以依家我都同新歌手講同樣嘅鼓勵說話。
Y：咁呢段時間過得值唔值得？
J：值得！有啲人比較幸福，條路比較易走，但我好感恩條路難行，反而令我嘅生命更加茁壯。而過程中一定有眼淚嘅，但慢慢將視線、歌曲、時間擺喺培育年輕人身上，發覺呢啲經歷係有意義，就算我畀人笑「攞錯獎、關家姐」，可以話畀佢哋知畀人笑唔緊要，人哋點睇唔重要，最緊要你自己知道係點。
Y：係喎，我留意到你放輕咗搞流行音樂，反而集中做你想做嘅事喎。
J：我發展緊「燃亮生命慈善基金」。依家社會好多年輕人有抑鬱，如果我哋唔正視問題，就掌握唔到下一代。而年輕人唔係話傾就傾，坐埋一齊都未必會同你講，但透過音樂就可以令佢哋打開心扉，肯聽你講，分享佢嘅嘢。透過同佢哋輔導，或者教佢哋音樂，希望幫助到呢班青少年，等佢哋唔使置諸絕望。
Y：其實依家樂壇青黃不接，女歌手位置更加係真空，你喺音樂方面仲有得爆㗎，希望你日後除咗做基金會方面，可以做更多有共鳴嘅歌！

關心妍(中)入行至今15年，走過高山低谷，雖然經歷過惡作劇及「搶獎」的蝦碌事，不但沒有一沉不起，更大方演唱《關家姐》，徐燦傑(右)形容關心妍有如重生股，翻炒再起。左為朱明銳。

Prof J(右)雖然未算關心妍的粉絲，不過十分欣賞她樂於透過音樂分享經歷。

2008年十大勁歌金曲頒獎禮，關心妍攞錯獎，引起一時熱話。

關心妍一早對惡搞取笑免疫，更唱出《關家姐》，與民同樂。

關心妍曾化身神秘歌手“C-12”，為聽眾帶來新感覺。

近年關心妍發展「燃亮生命慈善基金」，協助及輔導年輕人。

關心妍去年誕下女兒Jovia，一家三口幸福滿載。

http://www.metrodaily.hk/metro_news/%e5%a8%9b%e6%a8%82%e7%b6%93%e6%bf%9f%e5%ad%b8-%e3%80%8c%e6%83%a1%e6%90%9e%e3%80%8d%e8%87%aa%e5%98%b2-%e9%87%8d%e5%a5%aa%e4%ba%ba%e6%b0%a3-%e9%97%9c%e5%ae%b6%e5%a7%90%e3%80%8c%e9%87%8d%e7%94%9f/