關心妍（Jade）、周慧敏噚晚喺尖沙嘴出席「拉濶金曲開心夜慈善音樂會」，Jade話：「年尾會有7場報道會，今次嗰個騷係為咗報道會籌經費，目標籌2千萬，不過我都未知目前籌到幾多錢，我有出錢出力去支持。」
做慈善之外，最近佢忙緊幫囡囡楊榮心（Jovia）報Playgroup，雖然囡囡就嚟只係8個月大，Jade坦言：「好多家長都咁講， 0依家唔報嘅話，將來好多幼稚園都會唔收，因為一條龍政策，收生標準係先考慮收讀過Playgroup嗰啲學生，之後至收冇讀過嘅學生。」
Jade慨歎冇辦法，要跟住環境去行：「惟有盡量去配合，但我唔係怪獸家長，我同老公(楊長智)唔會太逼個女。」心心會唔會唔知返乜㗎？Jade話：「都係㗎，我哋會陪小朋友一齊返。」係咪學得香港教育制度有問題？佢再話：「學生有唔同嘅壓力，明白大環境係咁，有啲學校係商業掛帥。」雖然問題處處，但佢話希望囡囡先學好中文，首選讀本土學校，最後搞唔掂先考慮去外國讀書：「我真係唔要求佢讀到啲咩，但求開開心心，學校都會揀屋企附近，做到0依家嘅準標就好。」
關心妍話希望囡囡開開心心讀書！