–
關心妍(Jade)繼上年11月喺香港開個唱後,大前日將舞台移師澳門,舉行澳門站演唱會。今次個唱嘅rundown係佢自己排,唱咗唔少經典慘情歌好似〈放生〉、〈你有心〉、〈假使我漂亮〉等,當然唔少得唱自抽歌〈關家姐〉啦,當唱呢首歌時現場high爆。而關心妍仲再次挑戰王菲〈miss you night and day〉,呢首歌對佢意義重大,當年就係靠唱呢首歌羸咗喺歌唱比賽。
為咗今次個唱,Jade之前地獄式減肥個半月,點解?咪因為要着上一件超性感緊身透視長裙囉!呢條透視裙同另外兩套衫都係之前香港站係冇嘅,講番呢條咁sexy嘅裙,只係用銀片遮住重要部份,其他位置則若隱若現。Jade着上身後勁滿意︰「我條23吋腰返嚟喇,用咗1個半月時間地獄式減8磅。現在終於着得落,呢件衫最大鑊,要一啲肥肉都冇。」Jade係靠每日跑步,隔日做gym,仲要餐餐食枝豆、麵包同麥皮先可以有咁fit body。至於個演唱會仲請到雨僑做嘉賓,兩個合唱〈拈花惹草〉添。