關心妍（Jade）幾經辛苦，終於同老公楊長智造人成功，家下腹中塊肉已經五個月大，預產期係七月中，到時將會剖腹生產，喺呢度《壹》仔預祝阿Jade生產順利先。不過講時講，阿Jade個肚仔都開始現形，亦因為咁，成為匪徒目標，sorry係朋友目標至啱，人人都爭住同佢個肚合照。
尋日許廷鏗同欣宜，就喺街捉實阿Jade集郵，而佢哋嘅留言都係圍繞阿Jade肚皮嘅，好似許廷鏗話：「唔係好多時候，個肚仔同我有得揮。」有自知之明。而欣宜也加入自嘲：「第一次同Jade影相係佢個肚大過我。龔（梗）係要chok爆先得啦！」
